தமிழக அரசியலில் எப்போதுமே அதிரடி கருத்துகளைக் கூறும் நாஞ்சில் சம்பத், தற்போது அதிமுக-வின் எதிர்காலம் குறித்துப் பகீர் கிளப்பும் தகவல் ஒன்றை வெளியிட்டுள்ளார். ஊடகங்களுக்கு அளித்த பேட்டியில், “அதிமுக ஏற்கனவே இரண்டாகப் பிரிந்துவிட்டது. எடப்பாடி பழனிசாமிக்கு எதிராக எஸ்.பி. வேலுமணி போர்க்கொடி தூக்கியுள்ள நிலையில், சுமார் 36 அதிமுக எம்.எல்.ஏ-க்கள் முதல்வர் விஜய் தலைமையிலான தவெக அரசுக்கு ஆதரவளிக்கத் தயாராக உள்ளனர்” எனத் தெரிவித்துள்ளார்.
நாஞ்சில் சம்பத்தின் இந்த அறிக்கை அதிமுக வட்டாரத்தில் பெரும் அதிர்ச்சியை ஏற்படுத்தியுள்ளது. மேலும் பேசிய அவர், “எதிர்க்கட்சிகள் ஒருவேளை தவெக அரசுக்கு எதிராக நம்பிக்கையில்லா தீர்மானம் கொண்டு வந்தாலும், இந்த 36 எம்.எல்.ஏ-க்களின் ஆதரவுடன் முதல்வர் விஜய் தனது பெரும்பான்மையை மிக எளிதாக நிரூபிப்பார்” என்று ஆருடம் கூறியுள்ளார். அதிமுக-வுக்குள் நிலவும் அதிகாரப் போட்டி மற்றும் உட்கட்சிப் பூசலைச் சரியாகப் பயன்படுத்திக்கொண்டு, தவெக தனது பலத்தை அதிகரித்துக் கொள்ளும் என்ற நாஞ்சில் சம்பத்தின் பேச்சு தற்போது சமூக வலைதளங்களில் விவாதத்தைக் கிளப்பியுள்ளது.
