தமிழகத்தில் திமுக ஆட்சிக்காலத்தில் பெண் காவலர்களைக் கொண்டு பெண்களுக்கு பாதுகாப்பு அளிப்பதற்காக ‘பிங்க் பேட்ரோல்’ (Pink Patrol) என்ற சிறப்புத் திட்டம் கொண்டு வரப்பட்டது. தற்போது அந்த திட்டத்தையே பெயரையும், நிறத்தையும் மாற்றி ‘சிங்கப்பெண் சிறப்பு அதிரடிப்படை’ என்ற பெயரில் தற்போதைய அரசு புதிய திட்டமாகத் தொடங்கியுள்ளதாக அரசியல் வட்டாரத்தில் புதிய சர்ச்சை வெடித்துள்ளது.

முந்தைய அரசின் திட்டங்களுக்கு ஸ்டிக்கர் ஒட்டி, தங்களது சொந்த திட்டம் போல தற்போதைய அரசு விளம்பரம் தேடிக் கொள்வதாக எதிர்க்கட்சியினர் கடுமையான விமர்சனங்களை முன்வைத்து வருகின்றனர். ​இதுகுறித்து தூத்துக்குடியில் செய்தியாளர்களைச் சந்தித்த திமுக முன்னாள் அமைச்சர் கீதா ஜீவன், தற்போதைய அரசின் இந்த நடவடிக்கையை மிகக் கடுமையாகச் சாடியுள்ளார்.

திமுக ஆட்சியில் கொண்டுவரப்பட்ட ‘பிங்க் பேட்ரோல்’ திட்டத்தைத்தான் பெயர் மாற்றம் செய்து, வெறும் ஸ்டிக்கர் ஒட்டி ‘சிங்கப்பெண் சிறப்பு அதிரடிப்படை’ என்று தொடங்கியுள்ளார்கள் என அவர் பகிரங்கமாகக் குற்றம் சாட்டியுள்ளார். பெண்களின் பாதுகாப்பிற்காக கொண்டு வரப்பட்ட ஒரு திட்டத்தை மேம்படுத்துவதை விட்டுவிட்டு, வெறும் அரசியல் காரணங்களுக்காக பெயர் மாற்றம் செய்வதிலேயே இந்த அரசு குறியாக இருப்பதாக அவர் கூறியிருப்பது தற்போது சமூக வலைத்தளங்களில் விவாதப் பொருளாக மாறியுள்ளது.