”ராயபுரத்தின் முடிசூடா மன்னன்” எனத் தன்னைக் கூறிவந்த அதிமுகவின் மூத்த தலைவரும் முன்னாள் அமைச்சருமான டி.ஜெயக்குமார், இத்தேர்தலில் சந்தித்த தோல்வி தமிழக அரசியலையே உலுக்கியுள்ளது. தமிழக வெற்றிக் கழகத்தின் வேட்பாளர் விஜய் தாமுவின் அசுர வேகத்தில், ஜெயக்குமார் வெற்றி வாய்ப்பை இழந்தது மட்டுமல்லாமல், தனது டெபாசிட்டையே இழந்து படுதோல்வியைச் சந்தித்துள்ளார்.
முன்னாள் சபாநாயகராகவும், கட்சியின் தளபதியாகவும் வலம் வந்த ஒரு மூத்த தலைவர், தனது சொந்தத் தொகுதியிலேயே போதிய வாக்குகள் பெற முடியாமல் டெபாசிட் பறிகொடுத்திருப்பது அதிமுக தொண்டர்களிடையே பெரும் அதிர்ச்சியை ஏற்படுத்தியுள்ளது. ராயபுரம் மக்கள் மாற்றத்தை விரும்பி, பழைய அரசியல் முகங்களை முற்றிலுமாக நிராகரித்துள்ளதை இந்த முடிவு உரக்கச் சொல்கிறது. தமிழக வெற்றிக் கழகத்தின் இந்த வெற்றி, சென்னையின் அரசியல் வரலாற்றையே மாற்றி எழுதியுள்ளது.
