அமெரிக்க அதிபர் டொனால்ட் டிரம்ப், ஈரானுக்கு எதிரான ராணுவ நடவடிக்கைகளைத் தொடங்கி வைத்துள்ள சூழலில், போர்க்களத்தில் உயிரிழப்புகள் ஏற்படுவது தவிர்க்க முடியாதது என்று வெளிப்படையாகத் தெரிவித்துள்ளார்.
மேலும் ஈரானின் அணுசக்தி திட்டங்கள் மற்றும் ஏவுகணைத் தொழிற்சாலைகளை அழிப்பதே இந்தத் தாக்குதலின் முக்கிய நோக்கம் என்று குறிப்பிட்ட அவர், “துரதிர்ஷ்டவசமாக போர் என்று வரும்போது உயிரிழப்புகள் ஏற்படுவது இயல்பான ஒன்று” என்று கூறி, அமெரிக்க வீரர்களின் உயிர் தியாகம் குறித்த தனது நிலைப்பாட்டைப் பதிவு செய்துள்ளார்.
இதனால் கடந்த காலங்களில் “அந்நியப் போர்களை முடிவுக்குக் கொண்டு வருவேன்” என்று வாக்குறுதி அளித்த டிரம்பின் இந்த அதிரடி மாற்றம், சர்வதேச அரசியலில் பெரும் அதிர்வலைகளை ஏற்படுத்தியுள்ளது. இந்த ராணுவ நடவடிக்கையானது ஈரானின் அச்சுறுத்தல்களில் இருந்து அமெரிக்க மக்களையும் அதன் கூட்டாளிகளையும் பாதுகாப்பதற்கான ஒரு “புனிதமான பணி” என்று டிரம்ப் வர்ணித்துள்ளார்.
இந்நிலையில் ஈரானியப் படைகள் சரணடைய வேண்டும் அல்லது மரணத்தைச் சந்திக்க நேரிடும் என்று எச்சரித்த அவர், ஈரானிய மக்கள் தங்களின் தலைவிதியைத் தாங்களே தீர்மானிப்பதற்கான நேரம் வந்துவிட்டதாகவும் ஊக்கப்படுத்தினார்.
இருப்பினும், ஐக்கிய நாடுகள் சபை அல்லது அமெரிக்க நாடாளுமன்றத்தின் முறையான ஒப்புதல் இன்றி தொடங்கப்பட்டுள்ள இந்தப் போர், மத்திய கிழக்கில் நீண்டகால அமைதியற்ற சூழலை உருவாக்கும் என்றும், தேவையற்ற மனித உயிரிழப்புகளுக்கு வழிவகுக்கும் என்றும் உலக நாடுகளின் தலைவர்கள் மற்றும் அரசியல் விமர்சகர்கள் கவலை தெரிவித்து வருகின்றனர்.
