சென்னை உயர்நீதிமன்றத்தில், பாலியல் துன்புறுத்தலுக்கு உள்ளான பெண்ணை தொடர்ந்து அவமானப்படுத்தும் வகையில் நடத்தப்பட்ட போலீஸ் விசாரணையை நீதிபதி வெண் ஆன் வெங்கடேஷ் கடுமையாக கண்டித்தார். இணையதளங்களில் ஒரு பெண்ணின் அந்தரங்க வீடியோக்கள் பரவி வரும் நிலையில் அதனை நீக்க கோரி வழக்கறிஞர் தாக்கல் செய்த வழக்கின் விசாரணை நேற்று நடைபெற்றது.

மத்திய அரசு தரப்பில், இணையதளங்களை முடக்கும் நடவடிக்கைகள் எடுக்கப்பட்டதாகத் தெரிவித்த போதும், 39 புதிய இணையதளங்களில் மீண்டும் வீடியோக்கள் வெளியிடப்பட்டதாக மனுதாரர் தரப்பில் குற்றம் சாட்டப்பட்டது.

இணையதளங்களில் அந்தரங்க வீடியோக்கள் மேலும் பரவாமல் தடுக்கத் திட்டமிட்ட நடவடிக்கைகளை மத்திய அரசு எடுக்க வேண்டும் என்று நீதிபதி உத்தரவிட்டார்.

மேலும், பாதிக்கப்பட்ட பெண்ணிடம் போலீசார் மேற்கொண்ட விசாரணை முறையை நீதிபதி கண்டித்துள்ளார்.  ஏழு ஆண் போலீசாரின் முன்னிலையில் அந்தரங்க வீடியோவை பார்வையிட்டு குற்றவாளியை அடையாளம்  காட்டுமாறு சொல்லியிருப்பது பெண்ணின் மனநலத்துக்கு பெரும் பாதிப்பை ஏற்படுத்தியுள்ளதாக கண்டனம் தெரிவித்தார். இதுபோன்ற வழக்கு விசாரணைக்கு பெண் காவல் துறை அதிகாரிகளை ஈடுபடுத்த வேண்டும் என நீதிபதி வலியுறுத்தினார்.

முதன்முறையாக தாக்கல் செய்யப்பட்ட வழக்கில் பாதிக்கப்பட்ட பெண்ணின் பெயர் இடம்பெற்றுள்ளதாகக் கூறி, உடனடியாக அந்த பெயரை நீக்க காவல் துறைக்கு உத்தரவு வழங்கினார். இந்த வழக்கு விசாரணை ஜூலை 22ஆம் தேதிக்கு ஒத்திவைக்கப்பட்டுள்ளது.