குவைத்தில் பாராசூட் மூலம் தரை இறங்கிய அமெரிக்க போர் விமானி ஒருவரை, உள்ளூர் மக்கள் சூழ்ந்து கொண்டு தாக்க முயன்ற வீடியோ சமூக வலைதளங்களில் வைரலாகி வருகிறது. அவர் ‘அமெரிக்க வீரர்’ என்று தெரிந்தவுடன் மக்கள் அங்கிருந்து கலைந்து சென்றனர்.
சமூக வலைதளங்களில் வெளியாகி உள்ள வீடியோவில், அமெரிக்க வீரர் ஒருவர் பாராசூட் மூலம் தரையிறங்கிய பின், உள்ளூர் மக்கள் அவரை ஆக்ரோஷமாக நெருங்குவதைக் காண முடிகிறது. அவர்களில் ஒருவர் கையில் தடியுடன் அந்த வீரரைத் தாக்க முற்படுகிறார். மற்றொருவர் இந்தச் சம்பவத்தைத் தனது மொபைல் போனில் படம்பிடிக்கிறார்.
அந்த ஆக்ரோஷமான கூட்டத்தைக் கண்டு அச்சமடைந்த அமெரிக்க வீரர், தனது முழங்கால்களைத் தரையில் ஊன்றி, தன்னை விட்டுவிடுமாறு வேண்டுகோள் விடுக்கிறார். அந்த நேரத்தில், தான் ஒரு “அமெரிக்கர்” என்று அவர் உரக்கக் கூறியதும், அவரைச் சூழ்ந்திருந்த மக்கள் ஆர்வம் இழந்தவர்களாக அங்கிருந்து விலகிச் சென்றனர்.
இது குறித்துத் தகவல் தெரிவித்த அமெரிக்க ஊடகவியலாளர் ஒருவர், “குவைத் மக்கள் அந்த வீரரை ஈரான் நாட்டைச் சேர்ந்தவர் என்று தவறாகக் கருதியுள்ளனர். ஈரானிய போர் விமானம் ஒன்று சுட்டு வீழ்த்தப்பட்டதாக நினைத்து, அந்த வீரரைப் பிடிக்க அவர்கள் ஆக்ரோஷமாகச் சென்றுள்ளனர். ஆனால் அவர் அமெரிக்கர் என்று தெரிந்ததும் பின்வாங்கிவிட்டனர்,” என்று குறிப்பிட்டுள்ளார்.
தற்போது அந்த அமெரிக்க வீரர் பாதுகாப்பாக மீட்கப்பட்டுள்ளார். அவருடன் சேர்த்து மொத்தம் ஆறு விமானிகளும் பத்திரமாக இருப்பதை அமெரிக்கத் தரப்பு உறுதி செய்துள்ளது. மத்திய கிழக்கில் நிலவும் போர் பதற்றத்திற்கு மத்தியில், அடையாளக் குழப்பத்தால் நடந்த இந்தச் சம்பவம் சர்வதேச அளவில் கவனத்தைப் பெற்றுள்ளது.
