தமிழகத்தில் நிலவும் தொங்கு சட்டமன்ற சூழலில், தவெக-விற்கு திமுக கூட்டணி ஆதரவு அளிக்காவிட்டால், அவர்கள் அதிமுக பக்கம் சாய வாய்ப்புள்ளதா என்ற கேள்விக்கு சிபிஎம் தலைவர் சண்முகம் அதிரடியாகப் பதிலளித்துள்ளார். “தமிழகத்தில் மீண்டும் பாஜக அல்லது அதிமுக ஆட்சி அதிகாரத்திற்கு வருவதை நாங்கள் ஒருபோதும் அனுமதிக்க மாட்டோம்; என்பதில் மிக உறுதியாக இருக்கிறோம்” என்று அவர் திட்டவட்டமாகக் கூறினார். இதன் மூலம், தவெக ஆட்சி அமைப்பதில் முட்டுக்கட்டை ஏற்பட்டாலும், வகுப்புவாத சக்திகளுக்கு ஒருபோதும் இடமளிக்கப் போவதில்லை என்பதை அவர் உணர்த்தியுள்ளார்.
ஆட்சி அமைப்பதில் சிக்கல் நீடித்தால், அது குறித்து கட்சித் தலைமை ஆலோசித்து ‘நல்ல முடிவை’ எடுக்கும் என்று சண்முகம் மர்மமாகத் தெரிவித்தார். அதாவது, விஜய்யின் தவெக-விற்குத் தார்மீக ஆதரவு வழங்கி அதிமுக-வை அதிகாரத்திற்கு வராமல் தடுக்கும் திட்டம் இடதுசாரிகளிடம் இருக்கலாம் என்று அரசியல் விமர்சகர்கள் கணிக்கின்றனர். “கட்சியின் முடிவே இறுதியானது” என்று அவர் கூறியிருப்பது, தவெக-வுடன் திரைமறைவில் பேச்சுவார்த்தைகள் நடக்க வாய்ப்புள்ளதையே காட்டுகிறது.
