அமெரிக்கா மற்றும் ஈரான் இடையிலான போர்நிறுத்த உடன்படிக்கையில் பாகிஸ்தான் முக்கியத் தூதுவராகச் செயல்பட்டது அந்நாட்டு அரசியலில் பெரும் உற்சாகத்தை ஏற்படுத்தியுள்ளது.

இதனை ஒரு மிகப்பெரிய ராஜதந்திர வெற்றியாகக் கருதும் ஷாபாஸ் ஷெரீப் அரசாங்கம், இதற்காக நாடு தழுவிய அளவில் ‘நன்றி தெரிவிக்கும் நாள்’ கொண்டாட்டத்தை அறிவித்துள்ளது. இந்தப் போர்நிறுத்தம் மூலம் அமெரிக்கா மற்றும் மத்திய கிழக்கு நாடுகளுடனான தனது உறவை வலுப்படுத்திக்கொள்ளவும், அதன் மூலம் தனது பொருளாதார நெருக்கடிக்குத் தீர்வு காணவும் பாகிஸ்தான் திட்டமிட்டுள்ளது.

குறிப்பாக, பாதுகாப்பு ஒப்பந்தங்கள் மூலம் வளைகுடா நாடுகளிடமிருந்து அதிக முதலீடுகளையும் கடன்களையும் ஈர்க்க பாகிஸ்தான் முயற்சித்து வருகிறது.

இந்த வெற்றி ஒருபுறம் இருந்தாலும், பாகிஸ்தானுக்கு இது புதிய சிக்கல்களையும் உருவாக்கியுள்ளது. போர்நிறுத்தப் பேச்சுவார்த்தையின் போது தனது நீண்டகால நட்பு நாடான ஐக்கிய அரபு அமீரகத்தை பாகிஸ்தான் கலந்தாலோசிக்கவில்லை என்ற குற்றச்சாட்டு எழுந்துள்ளது.

இதனால் அதிருப்தி அடைந்துள்ள ஐக்கிய அரபு அமீரகம், தான் வழங்கிய 3.5 பில்லியன் டாலர் கடனை உடனடியாகத் திருப்பிச் செலுத்துமாறு பாகிஸ்தானை வற்புறுத்தி வருகிறது. ஒரே நேரத்தில் அமெரிக்காவுடன் நெருக்கமான உறவைப் பெற்றுள்ள பாகிஸ்தான், தனது அண்டை நாடுகளின் அதிருப்தியைச் சமாளிக்க வேண்டிய இக்கட்டான சூழலில் உள்ளது.