அமெரிக்கா மற்றும் ஈரான் நாடுகளுக்கு இடையே நிலவி வரும் பதற்றத்தைத் தணிக்கும் நோக்கில் பாகிஸ்தான் மேற்கொண்ட தூது முயற்சி படுதோல்வியில் முடிவடைந்துள்ளது. பாகிஸ்தான் ராணுவத் தளபதி ஜெனரல் ஆசிம் முனீர் நேரடியாக ஈரான் தலைநகர் தெஹ்ரானுக்குச் சென்று 48 மணிநேரம் தங்கியிருந்து பேச்சுவார்த்தை நடத்தியும், ஈரான் அரசு பாகிஸ்தானின் மத்தியஸ்தத்தை ஏற்க திட்டவட்டமாக மறுத்துவிட்டது.

பாகிஸ்தானின் இந்த ராஜதந்திர முயற்சி தோல்வியடைந்ததற்கு மூன்று முக்கிய காரணங்கள் முன்வைக்கப்படுகின்றன. அதாவது  அமெரிக்கா மற்றும் இஸ்ரேல் நாடுகள் ஈரான் மீது தாக்குதல் நடத்தியபோது, பாகிஸ்தான் ஈரானுக்கு ஆதரவாக ஒரு வார்த்தைகூட பேசவில்லை. பாகிஸ்தான் முற்றிலும் அமெரிக்காவின் அழுத்தத்தின் கீழ் செயல்படுவதாக ஈரான் சந்தேகிக்கிறது.

சவுதி அரேபியாவிடம் இருந்து நிதியுதவியைப் பெற்றுக்கொண்டும், அமெரிக்காவிடம் இருந்து ஆயுதங்களை வாங்கிக்கொண்டும் இருக்கும் ஒரு நாடு, எப்படி நடுநிலையான மத்தியஸ்தராகச் செயல்பட முடியும் என ஈரானின் முன்னாள் துணை அதிபர் கேள்வி எழுப்பியுள்ளார். ஒருவேளை அமெரிக்கா ஒப்பந்தத்தை மீறினால், அதற்கு எதிராக பாகிஸ்தான் நிற்காது என்பதை ஈரான் நன்கு உணர்ந்துள்ளது. இதனால் பாகிஸ்தானின் உத்தரவாதத்தை ஈரான் பொருட்படுத்தவில்லை.

இந்த அமைதி முயற்சியைத் தனது கௌரவப் பிரச்சினையாகக் கருதிய ஜெனரல் ஆசிம் முனீர், ராணுவ சீருடையிலேயே தெஹ்ரான் சென்று பேச்சுவார்த்தைகளை நடத்தினார். ஆனால், இந்த விவகாரத்தில் சீனா மௌனம் காப்பது பாகிஸ்தானுக்குப் பெரும் பின்னடைவாகக் கருதப்படுகிறது. முன்னதாக சீனாவின் வேண்டுகோளின் பேரில் சில முயற்சிகளுக்கு ஈரான் ஒத்துழைத்தது, ஆனால் இப்போது சீனாவே இந்தப் பிரச்சினையிலிருந்து சற்று விலகியே இருக்கிறது.

அமெரிக்காவுடனான இந்தப் பேச்சுவார்த்தை இஸ்லாமாபாத்தில் நடைபெறும் என பாகிஸ்தான் எதிர்பார்த்திருந்தது. ஆனால், ஈரானின் பிடிவாதத்தால் இப்போது இந்தப் பேச்சுவார்த்தை வேறு ஏதேனும் ஒரு நடுநிலையான நாட்டில் நடைபெற வாய்ப்புள்ளது. அமெரிக்காவிடம் கொடுத்த வாக்குறுதியை நிறைவேற்ற முடியாமல் போனது, சர்வதேச அளவில் பாகிஸ்தானுக்கும், குறிப்பாக ஜெனரல் ஆசிம் முனீருக்கும் ஒரு தர்மசங்கடமான சூழலை உருவாக்கியுள்ளது. மேலும் உலக நாடுகளின் கவனம் இப்போது பாகிஸ்தானைத் தவிர்த்து, இந்த அமைதிப் பேச்சுவார்த்தை அடுத்து எங்கு, எப்படி நகரும் என்பதில் நிலைகொண்டுள்ளது.