உலக புகழ்பெற்ற மலையேற்ற வீரரும், பல சாதனைகளுக்குச் சொந்தக்காரருமான நிர்மல் ‘நிம்ஸ்டாய்’ புர்ஜா, பாகிஸ்தான் ஆக்கிரமிப்பு காஷ்மீர் பகுதியில் உள்ள காரகோரம் மலைத்தொடரில் அமைந்துள்ள பிராட் பிக் சிகரத்தில் ஏற்பட்ட பயங்கர பனிச்சரிவில் (Avalanche) சிக்கி பரிதாபமாக உயிரிழந்துள்ளார்.

உலகின் 12-வது உயர்ந்த மலையான பிராட் பிக் சிகரத்தின் செங்குத்தான மேற்குப் பகுதி வழியே தனது குழுவினருடன் மலையேற்றப் பணியில் ஈடுபட்டிருந்தபோது இந்த எதிர்பாராத விபத்து நிகழ்ந்துள்ளது. இவருடன் சேர்ந்து பயணம் செய்த மற்ற மலையேற்ற வீரர்களும் இந்தத் துயரச் சம்பவத்தில் உயிர்ழந்துள்ளதாக அவரின் நிறுவனமான ‘எலைட் எக்ஸ்பெட்’ உறுதிப்படுத்தியுள்ளது.

கடந்த ஜூலை 31 அன்று நிகழ்ந்த இந்த கோர விபத்தில், நிர்மல் புர்ஜாவுடன் அவரது நம்பிக்கைக்குரிய வழிகாட்டிகளான புர் பகதூர் குருங் மற்றும் நிமா ஷெர்பா ஆகியோரும் பரிதாபமாக உயிரிழந்துள்ளனர். உலகின் மிகக் கடினமான மற்றும் ஆபத்தான பாதைகளில் ஒன்றாகக் கருதப்படும் அந்தப் பகுதியில் ஏற்பட்ட பனிச்சரிவு இத்தகைய பேரிடரை ஏற்படுத்தியுள்ளதாகத் தகவல்கள் தெரிவிக்கின்றன. இவர்களின் இழப்பு உலகளாவிய மலையேற்ற சமூகத்தினரிடையே ஆழ்ந்த சோகத்தையும் அதிர்ச்சியையும் ஏற்படுத்தியுள்ளதுடன், பலரும் தங்களது இரங்கல்களைத் தெரிவித்து வருகின்றனர்.

முன்னதாக பிரிட்டனின் சிறப்புப் படைகளில் பணியாற்றியுள்ள நிர்மல் புர்ஜா, உலகிலுள்ள 8,000 மீட்டருக்கும் அதிகமான உயரம் கொண்ட 14 பிரம்மாண்ட சிகரங்களை வெறும் ஆறு மாதங்கள் மற்றும் ஆறு நாட்களில் ஏறி உலக சாதனையைப் படைத்ததன் மூலம் உலகளவில் புகழ் பெற்றவர்.

இவரது சாகசப் பயணங்களை அடிப்படையாகக் கொண்டு நெட்ஃபிளிக்ஸ் வெளியிட்ட ’14 பீக்ஸ்’ ஆவணப்படம் கோடிக்கணக்கான மக்களை ஈர்த்ததுடன், பல இளைஞர்களுக்கு மலையேற்றத்தின் மீது ஆர்வத்தை ஏற்படுத்தியது. சாகச உலகின் நம்பிக்கை நட்சத்திரமாகத் திகழ்ந்த இவரது திடீர் மறைவு மலையேற்ற வரலாற்றில் ஒரு பெரிய வெற்றிடத்தை ஏற்படுத்தியுள்ளது.