டெல்லியில் பணிபுரியும் அரசு அதிகாரி ஒருவர் தனது 90,000 ரூபாய் மாதச் சம்பளத்தில், வெறும் 25,000 ரூபாயை மட்டுமே செலவழித்து சிக்கனமாக வாழ்வது குறித்த காணொளி இணையத்தில் வைரலாகியுள்ளது. கிருத்திகா என்ற அந்த அதிகாரி, இன்ஸ்டாகிராம் பதிவு ஒன்றின் மூலம் தனது மாதாந்திர செலவுகளைப் பிரித்துக் காட்டியுள்ளார்.
இதில் வீட்டு வாடகை (₹11,500) அவரது மிகப்பெரிய செலவாக உள்ளது. மேலும், டெல்லி அரசின் இலவச மின்சார வசதி மற்றும் சொந்த இருசக்கர வாகனம் பயன்படுத்துவது போன்ற காரணங்களால் அவர் போக்குவரத்து மற்றும் மின்சாரச் செலவுகளைத் திறம்படக் குறைத்திருப்பது பலரையும் ஆச்சரியத்தில் ஆழ்த்தியுள்ளது.
View this post on Instagram
“>
மேலும் வீட்டு உணவு உண்பதை வழக்கமாகக் கொண்டுள்ள அவர், உணவகங்களுக்குச் செல்லும் செலவைக் குறைத்து மாதத்திற்கு ₹2,000 மட்டுமே செலவிடுகிறார். மளிகைப் பொருட்கள், இணைய வசதி, தனிப்பட்ட பராமரிப்பு மற்றும் வீட்டுப் பணிப்பெண் என மற்ற அத்தியாவசியச் செலவுகளையும் மிகவும் திட்டமிட்டுச் செய்கிறார்.
இந்நிலையில் நெட்ஃபிக்ஸ் போன்ற பொழுதுபோக்குச் சேவைகளுக்குத் தனது நண்பர்கள் மற்றும் குடும்பத்தினரின் கணக்கைப் பயன்படுத்துவதன் மூலம் அந்தச் செலவையும் அவர் தவிர்த்து விடுகிறார். இத்தகைய சிக்கனமான வாழ்க்கை முறை, அதிக வருமானம் ஈட்டியும் நகர வாழ்க்கையில் பணத்தைச் சேமிக்க விரும்புவோருக்கு ஒரு சிறந்த உதாரணமாகப் பார்க்கப்படுகிறது.
