தமிழக தேர்தல் களம் உச்சக்கட்டத்தை எட்டியுள்ள நிலையில், திமுக தலைவர் ஸ்டாலினும், காங்கிரஸ் முன்னாள் தலைவர் ராகுல் காந்தியும் இணைந்து பிரசாரம் செய்யப்போவதில்லை என்ற தகவல் அரசியல் வட்டாரத்தில் பெரும் விவாதத்தைக் கிளப்பியுள்ளது. இது குறித்து விளக்கம் அளித்துள்ள திமுக மூத்த தலைவர் ஆர்.எஸ்.பாரதி, நேரமின்மை காரணமாகவே இருவரும் தனித்தனியாகப் பிரசாரம் செய்ய உள்ளதாகத் தெரிவித்துள்ளார்.
முன்னதாக, திமுக-வுடன் கூட்டணி அமைப்பதில் ராகுல் காந்திக்கு உடன்பாடில்லை என்று தகவல்கள் கசிந்த நிலையில், தற்போது இருவரும் ஒரே மேடையில் பிரசாரம் செய்யாதது அந்தச் சந்தேகத்தை உறுதிப்படுத்துவது போல் அமைந்துள்ளதாக அரசியல் விமர்சகர்கள் கருதுகின்றனர். இதனைப் பெரிய அரசியல் ஆயுதமாகக் கையில் எடுக்கத் திட்டமிட்டுள்ள எதிர்க்கட்சிகள், “கூட்டணிக்குள் குழப்பம்” என விமர்சிக்கத் தொடங்கியுள்ளன. இதனால் தமிழக தேர்தல் களம் மேலும் பரபரப்பாகியுள்ளது.
