சென்னையில் பேருந்துக்காகக் காத்திருந்த பெண் பொறியாளருக்குப் பாலியல் தொல்லை கொடுத்த ஜார்கண்ட் மாநிலத்தைச் சேர்ந்த இளைஞரை போலீஸார் கைது செய்தனர்.

சம்பவம் குறித்து போலீஸ் தரப்பில் கூறப்படுவதாவது:

ஜார்கண்ட் மாநிலத்தைச் சேர்ந்தவர் புரமோத் யாதவ் (35). இவர் சென்னை எழும்பூரில் உள்ள ஒரு இனிப்பு விற்பனை நிலையத்தில் ஊழியராகப் பணியாற்றி வந்தார்.

நேற்று முன்தினம், கீழ்ப்பாக்கம் பர்னபி சாலையில் உள்ள கணினி நிறுவனத்தில் பணியாற்றும் பெண் பொறியாளர் ஒருவர், வேலை முடிந்து வீட்டிற்குச் செல்வதற்காக அங்குள்ள பேருந்து நிறுத்தத்தில் காத்திருந்தார். அப்போது அங்கு வந்த புரமோத் யாதவ், அந்தப் பெண்ணுக்குப் பாலியல் தொல்லை கொடுத்ததாகக் கூறப்படுகிறது.

அதிர்ச்சியடைந்த அந்தப் பெண் கூச்சலிடவே, அருகில் இருந்தவர்கள் திரள்வதைக் கண்டு புரமோத் யாதவ் அங்கிருந்து தப்பியோடிவிட்டார். இதுகுறித்து பாதிக்கப்பட்ட பெண் அளித்த புகாரின் பேரில், கீழ்ப்பாக்கம் அனைத்து மகளிர் போலீஸார் வழக்குப் பதிவு செய்தனர்.

சம்பவம் நடந்த இடத்தில் இருந்த சிசிடிவி (CCTV) காட்சிகளை ஆய்வு செய்த போலீஸார், அதன் அடிப்படையில் தலைமறைவாக இருந்த புரமோத் யாதவைக் கைது செய்தனர். அவர் மீது பெண்கள் வன்கொடுமை தடுப்புச் சட்டத்தின் கீழ் வழக்குப் பதிவு செய்யப்பட்டுள்ளது. நீதிமன்றக் காவலில் அவர் சிறையில் அடைக்கப்படுவார் என போலீஸார் தெரிவித்தனர்.