மத்தியபிரதேச மாநிலம் மந்தசோர் மாவட்டத்தில் உள்ள நாராயணகர் பகுதியில், நள்ளிரவில் வீடொன்றின் படிக்கட்டில் பிரம்மாண்ட முதலை ஒன்று தஞ்சம் அடைந்த சம்பவம் அப்பகுதி மக்கள் இடையே பெரும் பீதியையும் அதிர்ச்சியையும் ஏற்படுத்தியுள்ளது.
வழக்கம்போல அதிகாலையில் வீட்டின் கதவைத் திறக்க வந்த உரிமையாளர், படிக்கட்டில் மாபெரும் முதலை ஒன்று அசையாமல் படுத்துறங்குவதைக் கண்டு உறையப்போனார். உடனடியாகத் தன் குடும்பத்தினரையும் அக்கம் பக்கத்தினரையும் எச்சரித்ததால், மிகப்பெரிய அசம்பாவிதம் தவிர்க்கப்பட்டது.
அருகிலுள்ள சம்பல் நதியில் இருந்து வழியைத் தவறி கிராமத்திற்குள் புகுந்த அந்த முதலை, குடியிருப்புப் பகுதிக்குள் நுழைந்து இந்த வீட்டின் படிக்கட்டைக் புகலிடமாகத் தேர்ந்தெடுத்துள்ளது. செய்தி காட்டுத்தீ போல் பரவியதை அடுத்து, கிராம மக்கள் அனைவரும் அச்சத்துடன் வீட்டின் முன் திரண்டனர்.
உடனடியாகத் தகவலறிந்த வனத்துறை அதிகாரிகள் மற்றும் மீட்புக் குழுவினர் சம்பவ இடத்திற்கு விரைந்து வந்தனர். முதலையின் அபாயகரமான தன்மையைக் கருத்தில் கொண்டு, வனத்துறையினர் மிகுந்த எச்சரிக்கையுடனும் சாதுரியத்துடனும் செயல்பட்டு, நீண்ட போராட்டத்திற்குப் பிறகு அந்த முதலையைப் பாதுகாப்பாக மீட்டு கூண்டில் அடைத்தனர்.
மீட்கப்பட்ட முதலை பின்னர் ஆட்களற்ற சம்பல் நதிப் பகுதியில் பாதுகாப்பாக விடுவிக்கப்பட்டது. இச்சம்பவம் தொடர்பாகப் பதிவு செய்யப்பட்ட வீடியோக்கள் தற்போது சமூக வலைதளங்களில் வெளியாகி, காண்போரைக் திகிலடைய வைத்து வைரலாகி வருகின்றன.
இந்நிலையில் நீர்நிலைகளுக்கு அருகில் இருக்கும் குடியிருப்புப் பகுதிகளில் வசிக்கும் பொதுமக்கள் இரவு நேரங்களில் மிகுந்த எச்சரிக்கையுடன் இருக்க வேண்டும் என வனத்துறை அதிகாரிகள் அறிவுறுத்தியுள்ளனர்.
