மத்திய கிழக்கில் நீடித்து வரும் அமெரிக்கா – ஈரான் போர் பதற்றம் காரணமாக, துபாய் சர்வதேச விமான நிலையத்தில் விமானப் போக்குவரத்துச் சேவையில் அதிரடி கட்டுப்பாடுகள் விதிக்கப்பட்டுள்ளன.

வான்வெளிப் பாதுகாப்பு மற்றும் விமான நிலைய நெரிசலைக் கருத்தில் கொண்டு, ஒரு நாட்டிற்கு ஒரு நாளைக்கு ஒரு விமானம் மட்டுமே இயக்க அனுமதி அளிக்கப்படும் என துபாய் சிவில் ஏவியேஷன் ஆணையம் அறிவித்துள்ளது.

வரும் ஏப்ரல் 30 முதல் மே 31 வரை அமலில் இருக்கப்போகும் இந்தக் கட்டுப்பாட்டால், இந்தியாவிலிருந்து துபாய்க்கு அதிக விமானங்களை இயக்கும் இண்டிகோ, ஏர் இந்தியா, விஸ்தாரா போன்ற நிறுவனங்கள் நிலைகுலைந்து போயுள்ளன.

உதாரணமாக, ஒரு நாளைக்கு 15 விமானங்கள் வரை இயக்கத் திட்டமிட்டிருந்த இண்டிகோ போன்ற நிறுவனங்கள், இனி ஒரு விமானத்தை மட்டுமே இயக்க முடியும் என்ற சூழல் உருவாகியுள்ளது.

இதனால் துபாய் செல்லக் காத்திருக்கும் ஆயிரக்கணக்கான இந்தியர்கள் பாதிக்கப்பட்டுள்ளதோடு, எஞ்சியிருக்கும் ஒரு சில விமானங்களுக்கான டிக்கெட் விலையும் விண்ணைத் தொடும் அளவிற்கு எகிறியுள்ளது.

வளைகுடா நாடுகளில் பணியாற்றும் இந்தியர்களுக்கு இது பெரும் சுமையாக மாறியுள்ள நிலையில், இந்திய விமானப் போக்குவரத்து அமைச்சகம் இது தொடர்பாகத் துபாய் அதிகாரிகளுடன் பேச்சுவார்த்தையில் ஈடுபட்டு வருகிறது.