கன்னியாகுமரி மாவட்டத்தில் நகை திருட்டு வழக்கில் கைது செய்யப்பட்டுள்ள ஒரு பெண் தொடர்பாக, தமிழக வெற்றிக் கழகம் (தவெக) மற்றும் திமுகவினர் இடையே சமூக வலைதளங்களில் கடும் வாக்குவாதம் உருவாகியுள்ளது.

விளவங்கோடு அருகே செருவலூர் பகுதியைச் சேர்ந்த அர்ஷிதா டிப்னி, திண்டிவனம் சட்டக் கல்லூரியில் பயிலும் மாணவி ஆவார். பயிற்சிக்காக நாகர்கோவில் நீதிமன்றத்திற்கு வருகை தந்தபோது, அங்கு வழக்கறிஞராக பணியாற்றும் விஜயகுமாருடன் அவருக்கு அறிமுகம் ஏற்பட்டதாக கூறப்படுகிறது.

இந்த நட்பின் தொடரில், கடந்த ஆகஸ்ட் 12 ஆம் தேதி விஜயகுமாரின் வீட்டிற்கு அர்ஷிதா சென்றிருந்தபோது, வீட்டு அறையில் இருந்த 11.25 பவுன் தங்க நகைகள் திருடப்பட்டதாக புகார் அளிக்கப்பட்டது.

இது தொடர்பாக ராஜாக்கமங்கலம் போலீசில் வழக்குப் பதிவு செய்யப்பட்டது. போலீசார் நடத்திய விசாரணையில், நகைகள் அர்ஷிதா டிப்னி என்பவரால் திருடப்பட்டதற்கான ஆதாரங்கள் கிடைத்தன. இதையடுத்து, அவரை போலீசார் கைது செய்தனர்.

இந்த சம்பவத்தைத் தொடர்ந்து, சமூக வலைதளங்களில் அர்ஷிதா டிப்னி தமிழக வெற்றிக் கழகத்தில் இணைச் செயலாளராக இருந்ததாக சிலர் புகார் எழுப்பினர். இதற்கு பதிலாக, தவெகவினர், அர்ஷிதா திமுகவைச் சேர்ந்தவர் என்றும், திமுக கொடி கட்டிய காரின் முன்பாக அவருடன் எடுத்த புகைப்படத்தை பகிர்ந்தும், விமர்சனங்களை வலுப்படுத்தினர்.

தவெக சார்பில், அதன் ஐடி விங்  இந்த விவகாரத்தில் விளக்கம் அளித்து, “அர்ஷிதா டிப்னி என்பவருக்கும் தவெகவுக்கும் எந்தவிதமான தொடர்பும் இல்லை. இது தொடர்பாக  பரப்பப்படும் தவறான தகவல்களை கண்டிக்கிறோம். அவர் திமுகவுடன் இணைந்தவர் என்பது ஆதாரங்களுடன் தெளிவுபடுத்தப்பட்டுள்ளது,” எனக் கூறப்பட்டது.

இந்தப் பதிவை பல தவெக விர்ச்சுவல் வாரியர்ஸ் பகிர்ந்து, திமுகவை கிண்டலடித்து வருகின்றனர்.

இதற்கு பதிலளிக்கும் வகையில், திமுகவினர், அர்ஷிதா டிப்னியின் புகைப்படம் ஒரு தவெக போஸ்டரில் இடம்பெற்றிருப்பதை சுட்டிக்காட்டி, அதுவே அவர் தவெக உறுப்பினராக இருந்ததை நிரூபிக்கிறது என பதிலடி கொடுத்து வருகின்றனர். இவ்வாறு, ஒரு நகைதிருட்டு வழக்கைத் தழுவி திமுக – தவெக இடையே சமூக வலைதளங்களில் தீவிர வார்த்தைப் போர் நடைபெற்று வருகிறது.