தமிழக அரசியலுக்கும் திரைத்துறைக்கும் நீண்டகாலத் தொடர்பு உண்டு. எம்.ஜி.ஆர், சிவாஜி கணேசன், ஜெயலலிதா, விஜயகாந்த், கமல்ஹாசன் எனப் பல முன்னணி நடிகர்கள் அரசியலில் தடம் பதித்த வரிசையில், தற்போது நடிகர் விஜய்யும் தனது ‘தமிழக வெற்றிக் கழகம்’ கட்சி மூலம் இணையவுள்ளார்.

கடந்த காலங்களில் எம்.ஜி.ஆர், ஜெயலலிதா மற்றும் விஜயகாந்த் ஆகியோர் தங்களின் முதல் தேர்தலிலேயே வெற்றி பெற்று முத்திரை பதித்தனர். ஆனால், சிவாஜி கணேசன் மற்றும் கமல்ஹாசன் போன்றவர்களுக்கு முதல் தேர்தல் தோல்வியையே தந்தது.

இந்த நிலையில், விஜய் தனது முதல் தேர்தல் களத்தில் எந்தத் தொகுதியைத் தேர்வு செய்வார் என்ற எதிர்பார்ப்பு அதிகரித்துள்ளது. விஜய் போட்டியிடும் தொகுதி குறித்துப் பல்வேறு யூகங்கள் நிலவி வந்த நிலையில், தற்போது சென்னை ‘வேளச்சேரி’ தொகுதியில் அவர் போட்டியிட அதிக வாய்ப்புள்ளதாகக் கூறப்படுகிறது.

ஜோதிட ரீதியாக ‘வி’ எழுத்தில் தொடங்கும் தொகுதிகள் ராசியானவை என்ற சென்டிமென்ட் ஒருபுறம் இருந்தாலும், நிர்வாக ரீதியான காரணங்களும் இதற்குப் பின்னால் உள்ளன. வேளச்சேரி தொகுதி விஜய் வசிக்கும் பனையூர் பகுதிக்கு அருகில் இருப்பதால், பிரச்சாரப் பணிகளை மேற்கொள்வது எளிதாக இருக்கும் என்று அவரது தரப்பு ஆலோசித்து வருகிறது.

முக்கியமாக, வேளச்சேரி தொகுதியில் முதல் தலைமுறை வாக்காளர்களும், தகவல் தொழில்நுட்பத் துறையில் பணிபுரியும் இளைஞர்களும் அதிகம் உள்ளனர். இது விஜய்யின் வெற்றிக்குச் சாதகமாக அமையும் என்று கள ஆய்வுகள் தெரிவிக்கின்றன. மேலும், இது 2011-ல் உருவாக்கப்பட்ட புதிய தொகுதி என்பதால், திராவிடக் கட்சிகள் இங்கு இன்னும் ஆழமாக வேரூன்றவில்லை என்பதும் ஒரு கூடுதல் காரணமாகப் பார்க்கப்படுகிறது.

எனினும், தேர்தல் தேதி அறிவிக்கப்படும் வரை விஜய் போட்டியிடும் தொகுதி குறித்த ரகசியம் நீடிக்கும் என்றே தெரிகிறது.