தமிழக வெற்றிக் கழகத்தின் தேர்தல் அறிக்கை குழு தலைவர் அருண்ராஜ், திருச்சியில் செய்தியாளர்களைச் சந்தித்தபோது திமுக அரசு மீது மிகக் கடுமையான குற்றச்சாட்டுகளை முன்வைத்தார். அரசியல் கட்சிகள் கூட்டம் நடத்துவதற்குப் பொதுவான வழிகாட்டுதல் நெறிமுறைகள் இருந்தாலும், ஆளுங்கட்சியான திமுகவினர் கூட்டம் நடத்தினால் மட்டும் உடனடியாக அனுமதி வழங்கப்படுவதாக அவர் சாடினார். ஆனால், தவெக சார்பில் அனுமதி கோரினால் மட்டும் முட்டுக்கட்டை போடப்படுவதாகவும், இது ஜனநாயகத்திற்கு எதிரானது என்றும் அவர் ஆவேசமாகத் தெரிவித்தார்.
மேலும், தவெகவின் அசுர வளர்ச்சியைப் பார்த்து திமுகவுக்குப் பயம் வந்துவிட்டதாகக் குறிப்பிட்ட அருண்ராஜ், அதன் காரணமாகவே நடிகர் விஜய் மக்களைச் சந்திப்பதைத் தடுக்கப் பல்வேறு முயற்சிகள் மேற்கொள்ளப்படுவதாகக் கூறினார். “திமுகவின் இந்த முட்டுக்கட்டைகளையும் மீறி, தளபதி விஜய் மக்களைச் சந்திப்பது உறுதி” என்று அவர் சவால் விடும் வகையில் பேசியிருப்பது அரசியல் வட்டாரத்தில் பெரும் சலசலப்பை ஏற்படுத்தியுள்ளது. விஜய்யின் அரசியல் வருகை ஆளுங்கட்சிக்கு நெருக்கடியைத் தருகிறதா என்கிற விவாதமும் இப்போதே சூடுபிடிக்கத் தொடங்கிவிட்டது.
