ஈரான் உடனான போரில் அமெரிக்க அதிபர் டொனால்ட் ட்ரம்ப் சர்வதேச நாடுகளின் ஆதரவின்றித் தனித்து விடப்பட்டுள்ளார். உக்ரைன் – ரஷ்யா போரில் உக்ரைனுக்கு ஆதரவாக நின்ற நாடுகள் கூட, ஈரான் விவகாரத்தில் அமெரிக்காவிற்கு உதவ முன்வராதது வெள்ளை மாளிகையைப் பெரும் அதிர்ச்சியில் ஆழ்த்தியுள்ளது.

கடந்த பிப்ரவரி 28, 2026 அன்று அமெரிக்கா மற்றும் இஸ்ரேல் இணைந்து ஈரான் மீது கூட்டுத் தாக்குதலை நடத்தின. இதற்குப் பதிலடியாக, வளைகுடா நாடுகளில் உள்ள அமெரிக்க ராணுவத் தளங்களைக் குறிவைத்து ஈரான் நடத்திய ஏவுகணைத் தாக்குதலில், அமெரிக்காவின் அதிநவீன ராடார் அமைப்புகள் தகர்க்கப்பட்டன. இந்தச் சம்பவத்தைத் தொடர்ந்து, வளைகுடா நாடுகளும் அமெரிக்காவிடமிருந்து மெல்ல விலகிச் செல்லத் தொடங்கியுள்ளன.

ஹார்முஸ் ஜலசந்தி  பகுதியில் ஈரானுக்கு எதிராக ராணுவ உதவி செய்யுமாறு ஐரோப்பிய நாடுகளுக்கு ட்ரம்ப் விடுத்த கோரிக்கையை நேட்டோ நாடுகள் நிராகரித்துவிட்டன. இது குறித்துப் பேசிய ட்ரம்ப், “பெரும்பாலான நேட்டோ உறுப்பு நாடுகள் ஹார்முஸ் ஜலசந்தி விவகாரத்தில் உதவ விரும்பவில்லை” எனத் தனது அதிருப்தியை வெளிப்படுத்தியுள்ளார். சர்வதேச அளவில் மட்டுமல்லாமல், அமெரிக்காவிற்குள்ளும் ட்ரம்பிற்கு எதிர்ப்பு கிளம்பியுள்ளது:

ஈரானுடனான போர் தேவையற்றது எனக் கூறி அமெரிக்கத் தேசிய பயங்கரவாத எதிர்ப்பு மைய இயக்குநர் ஜோ கென்ட் பதவியை ராஜினாமா செய்தது ட்ரம்பிற்குப் பலத்த அடியைக் கொடுத்துள்ளது. ஈரானில் ராணுவ நடவடிக்கைகளைத் தொடர நாடாளுமன்றத்தின்  ஒப்புதலைப் பெற வேண்டும் என எதிர்க்கட்சியான ஜனநாயகக் கட்சியினர் தீர்மானம் கொண்டு வந்தனர். செனட்டில் 53-47 மற்றும் பிரதிநிதிகள் சபையில் 219-212 என இத்தீர்மானம் நூலிழையில் தோற்கடிக்கப்பட்டாலும், ட்ரம்பின் போர்ப்போக்கிற்கு எதிராக வலுவான குரல்கள் ஒலிக்கத் தொடங்கியுள்ளன.

முக்கியமான கடல் வழிப்பாதையான ஹார்முஸ் ஜலசந்தி இன்னும் ஈரானின் முழு கட்டுப்பாட்டில் இருப்பதாலும், அது மூடப்பட்டிருப்பதாலும் உலக நாடுகள் பல அமெரிக்கா மீது அதிருப்தியில் உள்ளன. இதனால் சர்வதேசச் சந்தையில் கடும் பாதிப்புகள் ஏற்பட்டுள்ளன. மேலும் ஆதரவாளர்கள் விலகிச் செல்வதும், சர்வதேச நாடுகள் கைவிடுவதும் ட்ரம்பை ஈரானுடனான போரில் ஒரு ‘தனிமைப்படுத்தப்பட்ட வீரராக’ மாற்றியுள்ளதாக அரசியல் நோக்கர்கள் கருதுகின்றனர்.