சமையலில் அத்தியாவசியப் பொருளாக விளங்கும் வெங்காயத்தின் விலை கடந்த சில நாள்களாக தொடர்ந்து உயர்ந்து வருகிறது. சில மாதங்களுக்கு முன்பு கிலோ ரூ.18 முதல் ரூ.25 வரை விற்பனை செய்யப்பட்ட வெங்காயம், தற்போது சென்னை கோயம்பேடு சந்தையில் ரூ.70-ஐ தாண்டியுள்ளது. வரும் நாள்களில் அதன் விலை மேலும் உயர்ந்து கிலோ ரூ.100 வரை செல்ல வாய்ப்புள்ளதாக வியாபாரிகள் தெரிவித்துள்ளனர். இதனால் அன்றாட சமையலுக்காக வெங்காயம் வாங்கும் பொதுமக்கள் கடும் சிரமத்துக்கு உள்ளாகியுள்ளனர்.

வெங்காய விலை உயர்வைக் கட்டுப்படுத்தும் நடவடிக்கையாக மத்திய அரசு தனது கையிருப்பில் உள்ள வெங்காயத்தை பல்வேறு மாநிலங்களுக்கு அனுப்பி வருகிறது. மகாராஷ்டிர மாநிலம் நாசிக்கில் சேமித்து வைக்கப்பட்டுள்ள வெங்காயத்தில் இருந்து சிறப்பு ரயில் மூலம் தமிழகத்துக்கும் வெங்காயம் கொண்டு வரப்பட்டுள்ளது. சென்னை, மதுரை உள்ளிட்ட முக்கிய பகுதிகளுக்கு இந்த வெங்காயம் வந்தடைந்துள்ளது. இதன் மூலம் சந்தையில் ஏற்பட்டுள்ள விலை உயர்வை ஓரளவு கட்டுப்படுத்த முடியும் என எதிர்பார்க்கப்படுகிறது.

இதனையடுத்து தமிழகத்தில் பொதுமக்களுக்கு குறைந்த விலையில் வெங்காயம் வழங்க நடவடிக்கை எடுக்கப்பட்டுள்ளது. அதன்படி, செப்டம்பர் 3-ஆம் தேதி முதல் நகர்ப்புறங்களில் உள்ள 8,233 நியாய விலைக் கடைகள் மூலம் வெங்காயம் விற்பனை செய்யப்பட உள்ளது. குடும்ப அட்டைதாரர்களுக்கு ஒரு குடும்ப அட்டைக்கு ஒரு கிலோ வெங்காயம் ரூ.35 என்ற விலையில் வழங்கப்படும் என தெரிவிக்கப்பட்டுள்ளது. விலை உயர்வால் பாதிக்கப்பட்டுள்ள குடும்பங்களுக்கு இந்த நடவடிக்கை சற்று நிவாரணம் அளிக்கும் என எதிர்பார்க்கப்படுகிறது.

மேலும், கூட்டுறவு பண்டக சாலைகள் மற்றும் அமுதம் அங்காடிகள் மூலமாகவும் கிலோ ரூ.35-க்கு வெங்காயம் விற்பனை செய்யப்படும் என தெரிவிக்கப்பட்டுள்ளது. சந்தையில் வெங்காயத்தின் விலை தொடர்ந்து அதிகரித்து வரும் நிலையில், அரசு குறைந்த விலையில் விற்பனை செய்யும் இந்த நடவடிக்கை பொதுமக்களிடையே வரவேற்பைப் பெற்றுள்ளது. வரும் நாள்களில் வெங்காயத்தின் விலை மேலும் உயராமல் தடுக்க அரசு மேற்கொள்ளும் நடவடிக்கைகள் முக்கியத்துவம் பெற்றுள்ளன.