மத்தியப் பிரதேச மாநிலம் தார் மாவட்டத்தில், 5 வயது சிறுமிக்கு நேர்ந்த கொடூரச் சம்பவம் பெரும் அதிர்ச்சியை ஏற்படுத்தியுள்ளது. கடந்த ஜனவரி 28-ஆம் தேதி மாலை, வீட்டின் முன் விளையாடிக்கொண்டிருந்த சிறுமியிடம், 22 வயதான சிவம் பார்மர் என்ற இளைஞர் சாக்லேட் தருவதாக ஆசை வார்த்தை கூறி தனது வீட்டிற்கு அழைத்துச் சென்றுள்ளார்.

அங்கு வீட்டின் கதவை பூட்டிவிட்டு அந்தச் சிறுமிக்கு பாலியல் ரீதியாகத் தொல்லை கொடுத்துள்ளார். சிறுமியின் அலறல் சத்தத்தைக் கேட்டு அச்சமடைந்த அந்த நபர் அங்கிருந்து தப்பியோடிவிட்டார்.

பாதிக்கப்பட்ட சிறுமி தனது தாயிடம் நடந்ததைக் கூற, உடனடியாகப் பெற்றோர் காவல் நிலையத்தில் புகார் அளித்தனர். இந்தப் புகாரின் அடிப்படையில் பிஎன்எஸ்  சட்டப்பிரிவுகள் மற்றும் போக்ஸோ சட்டத்தின் கீழ் வழக்குப் பதிவு செய்த போலீஸார், தலைமறைவாக இருந்த சிவம் பார்மரை அதிரடியாகக் கைது செய்தனர்.

தற்போது அவர் மீது சட்ட ரீதியான நடவடிக்கைகள் எடுக்கப்பட்டு, நீதிமன்றத்தில் ஆஜர்படுத்தும் பணிகள் நடைபெற்று வருகின்றன. இச்சம்பவம் அப்பகுதியில் பெரும் கொந்தளிப்பை ஏற்படுத்தியுள்ளது.