கோவையில் பொதுமக்கள் அதிகம் கூடும் முக்கிய இடங்களில் போதைப்பொருள் நடமாட்டத்தை முற்றிலுமாக தடுக்கும் பொருட்டு, காவல்துறையினர் இன்று திடீர் ஆய்வில் ஈடுபட்டனர்.

மாநகர காவல் ஆணையரின் உத்தரவின் பேரில், 300-க்கும் மேற்பட்ட போலீசார் தனித்தனி குழுக்களாகப் பிரிந்து காந்திபுரம், சிங்காநல்லூர் உள்ளிட்ட முக்கிய பேருந்து நிலையங்கள், இரயில் நிலைய வளாகங்கள் மற்றும் வெளிமாநிலங்களில் இருந்து சரக்குகள் வரும் பார்சல் குடோன்களில் தீவிர சோதனையை மேற்கொண்டனர்.

சந்தேகத்திற்கு இடமளிக்கும் வகையில் சுற்றித் திரிந்தவர்களிடம் நடத்தப்பட்ட முதற்கட்ட விசாரணையைத் தொடர்ந்து, மோப்ப நாய்கள் மற்றும் நவீன கருவிகளின் உதவியுடன் பார்சல் பொட்டலங்களும் அக்குவேறு ஆணிவேறாக சோதிக்கப்பட்டன.

கல்வி நிறுவனங்கள் மற்றும் பொது இடங்களில் போதைப்பொருள் கலாச்சாரத்தை வேரறுக்க இதுபோன்ற திடீர் சோதனைகள் தொடர்ந்து நீடிக்கும் என காவல்துறை தரப்பில் எச்சரிக்கப்பட்டுள்ளது.