சென்னையின் தாம்பரம் கேம்ப் ரோடு சிக்னல் அருகே, சாலையோரத்தில் ஒரு சிறுமி மிகுந்த கவனத்துடன் படித்துக் கொண்டிருக்கும் நெஞ்சை உருக்கும் வீடியோ ஒன்று சமூக வலைத்தளங்களில் வைரலாகி வருகிறது.

இதுகுறித்து சந்தோஷ் என்ற சென்னையைச் சேர்ந்த நபர் இன்ஸ்டாகிராமில் பகிர்ந்துள்ள இந்த வீடியோவில், அச்சிறுமியின் தாய் அருகில் பூ வியாபாரம் செய்து கொண்டிருக்க, அந்தச் சிறுமி நடைபாதையில் அமர்ந்து படித்துக் கொண்டிருக்கிறார்.

“>

மேலும் பொழுது சாய்ந்து இருள் சூழ்ந்த பிறகும் படிப்பை நிறுத்தாத அந்தச் சிறுமி, அங்கிருந்த ஒரு சாலையோரக் கடையின் வெளிச்சத்தைப் பயன்படுத்தித் தனது பாடங்களைத் தொடர்ந்து படித்துள்ளார். வறுமையான சூழலிலும் கல்வியே தன் நிலையை மாற்றும் ஒரே ஆயுதம் என்ற நம்பிக்கையுடன் படித்துக் கொண்டிருந்த அந்தச் சிறுமியின் உறுதி காண்போர் நெஞ்சங்களை நெகிழச் செய்துள்ளது.

இந்த வீடியோ சமூக வலைத்தளங்களில் வேகமாகப் பரவியதை அடுத்து, சிறுமியின் கல்வி ஆர்வத்தையும், மகளின் படிப்பிற்காகப் பாடுபடும் அந்தத் தாயின் கடின உழைப்பையும் இணையவாசிகள் பலரும் பாராட்டி வருகின்றனர். வெறும் பாராட்டுகளோடு நின்றுவிடாமல், அந்தச் சிறுமியின் கல்விப் பயணத்தை எளிதாக்கும் வகையில் பல அந்நிய நபர்கள் தானாக முன்வந்து உதவத் தொடங்கியுள்ளனர்.

இந்நிலையில் அச்சிறுமி வசதியாகப் படிப்பதற்குத் தேவையான படிக்கும் மேஜை எழுதுபொருட்கள் மற்றும் இதர அத்தியாவசியப் பொருட்களை வழங்கி தங்களது ஆதரவை வெளிப்படுத்தியுள்ளனர். கடினமான சூழ்நிலையிலும் இருளைப் பொருட்படுத்தாமல் சாதிக்கத் துடிக்கும் ஒரு சிறுமியின் விடாமுயற்சியும், அதற்குப் பக்கபலமாக இருக்கும் தாயின் அர்ப்பணிப்பும் சமூகத்தில் மனிதநேயத்தை மீண்டும் பறைசாற்றியுள்ளது.