அமெரிக்க முன்னாள் அதிபர் டொனால்ட் டிரம்பின் உடல்நிலை குறித்த விவாதங்கள் மீண்டும் அந்நாட்டு அரசியலில் சூடுபிடித்துள்ளன. அண்மையில் அவர் விமானத்திலிருந்து இறங்கும் போது தட்டு தடுமாறி நடந்த வீடியோ ஒன்று சமூக வலைதளங்களில் வெளியாகி, பெரும் பரபரப்பை ஏற்படுத்தியுள்ளது.

டொனால்ட் டிரம்ப் தனது ‘ஏர் ஃபோர்ஸ் ஒன்’ (Air Force One) விமானம் மூலம் மார்-ஏ-லாகோ (Mar-a-Lago) வந்திறங்கினார். அப்போது விமானத்தின் படிக்கட்டுகளில் அவர் மிகவும் நிதானமாகவும், மெதுவாகவும் இறங்குவது போன்ற காட்சிகள் வெளியாகியுள்ளன. படிக்கட்டுகளின் பாதியிலேயே அவர் சிறிது நேரம் நின்று, மிகுந்த எச்சரிக்கையுடன் கீழே இறங்கியது அனைவரது கவனத்தையும் ஈர்த்தது.

இந்த வீடியோவை அடிப்படையாகக் கொண்டு, “டிரம்பிற்கு உடல் ரீதியாக ஏதேனும் அசௌகரியம் அல்லது அதீத சோர்வு ஏற்பட்டுள்ளதா?” என சமூக வலைதளங்களில் நெட்டிசன்கள் கேள்வி எழுப்பி வருகின்றனர்.

டிரம்பின் நடை இயல்பாக இல்லை என்றும், அவர் ஒருவிதமாகத் தள்ளாடி  நடப்பதாகவும் எக்ஸ் (X) உள்ளிட்ட தளங்களில் விமர்சனங்கள் எழுந்துள்ளன. இதற்கு முன்பு அவரது கணுக்கால் வீக்கம் மற்றும் கைகளில் காணப்பட்ட நிறமாற்றம் ஆகியவை குறித்து எழுந்த சந்தேகங்களையும் இதனுடன் ஒப்பிட்டுப் பலரும் கருத்து தெரிவித்து வருகின்றனர். முக்கிய அரசியல் தலைவர்களின் உடல்நலன் குறித்த வெளிப்படைத்தன்மை இருக்க வேண்டும் என்று ஒரு தரப்பினர் வலியுறுத்தி வரும் நிலையில், இது திட்டமிட்ட அரசியல் விமர்சனம் என மற்றொரு தரப்பினர் பதிவிட்டு வருகின்றனர்.

தன் மீதான உடல்நலப் புகார்களை டிரம்ப் தொடர்ந்து மறுத்தே வருகிறார். தனது உடல்நிலை குறித்து வெள்ளை மாளிகையின் முன்னாள் மருத்துவர் ரோனி ஜாக்சன் வழங்கிய “மிகவும் ஆரோக்கியமானவர்” என்ற சான்றிதழை அவர் முன்னுதாரணமாகக் குறிப்பிடுகிறார். வரும் நாட்களில் அவர் பல பொதுக்கூட்டங்களிலும், பயணங்களிலும் பங்கேற்க உள்ளதாகவும் அவரது அலுவலகம் தெரிவித்துள்ளது.

மேலும் சமூக வலைதளங்களில் இந்தப் புகைப்படம் மற்றும் வீடியோக்கள் வைரலாகி வரும் போதிலும், மருத்துவ ரீதியாக அவருக்குப் பலவீனம் இருப்பதாக இதுவரை எந்த அதிகாரப்பூர்வ அறிவிப்பும் வெளியாகவில்லை. தற்போது எழுந்துள்ள விவாதங்கள் அனைத்தும் பொதுமக்களின் தனிப்பட்ட பார்வைகளின் அடிப்படையிலேயே அமைந்துள்ளன என்பது குறிப்பிடத்தக்கது.