2020-ஆம் ஆண்டு, ஆகஸ்ட் 15… தேசமே தனது சுதந்திர தினக் கொண்டாட்டத்தில் மூழ்கியிருந்த அந்த அமைதியான மாலை 7:30 மணி! இந்திய கிரிக்கெட் ரசிகர்களின் இதயங்களை ஒரே நொடியில் நொறுக்கும் வண்ணம் அந்த அறிவிப்பு வந்தது. ‘தல’ மகேந்திர சிங் தோனி சர்வதேச கிரிக்கெட்டில் இருந்து ஓய்வு பெறுவதாக அறிவித்தார்.
அந்த அதிர்ச்சியிலிருந்து ரசிகர்கள் மீள்வதற்குள்ளாகவே, அடுத்த சில நிமிடங்களில் ‘சின்ன தல’ சுரேஷ் ரெய்னாவும் தனது ஓய்வை அறிவித்தார். “உங்கள் பயணத்தில் தானும் இணைவதாக” ரெய்னா பதிவிட்ட அந்த வார்த்தைகள், இரண்டு மனிதர்களுக்கு இடையேயான ஆழமான நட்பின் உச்சத்தைக் காட்டியது.
ஆனால், அன்று அந்த ஆடை மாற்றும் அறைக்குள் (Dressing Room) உண்மையில் என்ன நடந்தது? ரெய்னாவின் இந்த முடிவைக் கேட்டு தோனி எப்படி எதிர்வினை ஆற்றினார்? ஆண்டுகள் கழித்து, முன்னாள் இந்திய வீரர் ஆகாஷ் சோப்ரா உடனான நேர்காணலில் சுரேஷ் ரெய்னாவே அந்த உணர்ச்சிப்பூர்வமான உண்மைப் பின்னணியை வெளிப்படுத்தியுள்ளார்.
“முடிந்துவிட்டது…” – தோனியைத் திகைக்க வைத்த ரெய்னா!
ஆடுகளத்தில் தோனியும் ரெய்னாவும் இணைந்து அடித்த சிக்ஸர்களும், கட்டியணைத்துக் கொண்ட தருணங்களும் கோடி ரசிகர்களின் மனதில் இன்றும் பசுமையாக இருக்கின்றன.
அன்றைய நாளில் தனது ஓய்வு முடிவை தோனியிடம் கூறிய தருணத்தை ரெய்னா நினைவுகூர்கிறார்:
“இது எல்லாமே ஆட்டத்தைப் பற்றியது, இல்லையா? ஒரு வீரராக, இதற்காகத்தான் நீங்கள் வாழ்நாள் முழுவதும் உழைக்கிறீர்கள். நாட்டிற்காக எவ்வளவோ செய்கிறீர்கள், பெற்றோர் பல தியாகங்களைச் செய்திருக்கிறார்கள். ஆனால், அந்தத் தருணத்தில் அதுதான் சிறந்த முடிவு என்று என் மனம் உணர்ந்தது. குடும்பத்துடன் நேரத்தைச் செலவிட விரும்பினேன். அப்போது எனக்கு 32 அல்லது 33 வயது. நான் ஆடை மாற்றும் அறைக்குள் சென்று, ‘முடிந்துவிட்டது…’ என்று சொன்னபோது, தோனி அதிர்ந்துபோய், ‘என்ன செய்துவிட்டாய்?’ என்று கேட்டார்!”
தோனியே எதிர்பார்க்காத அந்த திடீர் முடிவு, அவர்களின் நட்பின் ஆழத்தையும், ரெய்னா தனக்காக எடுத்த அந்தத் துணிச்சலான முடிவையும் வெளிப்படுத்தியது.
கேப்டன் செய்த தியாகம்:
தோனியுடனான தனது நெகிழ்ச்சியான பந்தத்தைப் பற்றிப் பேசிய ரெய்னா, தோனி என்ற மாபெரும் தலைவன் தனக்காகச் செய்த தியாகங்களை நன்றியோடு நினைவு கூர்ந்தார்:
“அப்போது நாங்களெல்லாம் கேப்டனுக்காகவும் அணிக்காகவும்தான் விளையாடினோம். ஆனால், நான் பேட்டிங் வரிசையில் மேலே வந்து சிறப்பாக ஆடுவதற்காக, கேப்டனாக இருந்த தோனி தன் சொந்த பேட்டிங் பொசிஷனையே விட்டுக்கொடுத்தார்!
சௌரவ் கங்குலி கேப்டனாக இருந்தபோது, தோனி பேட்டிங் வரிசையில் மேலே ஆடுவார். ஆனால், தான் கேப்டன் பொறுப்பேற்றதும், ‘யுவி பா, நீங்கள் மேலே செல்லுங்கள்; சுரேஷ், நீங்கள் இங்கே ஆடுங்கள்; நான் கீழே இறங்கி ஆடுகிறேன்’ என்று சொல்லி, தனக்கான வாய்ப்புகளை எங்களுக்குக் விட்டுக்கொடுத்தார்.”
View this post on Instagram
“>
தோனியின் இந்த மனிதநேயமும், களத்தில் காட்டிய அன்பும்தான் தன்னைக் கடினமாக உழைக்கவும், அணிக்காக எதையும் செய்யத் தூண்டியதாகவும் ரெய்னா நெகிழ்ச்சியுடன் குறிப்பிடுகிறார்.
சுயநலமும் போட்டிகளும் நிறைந்த விளையாட்டு உலகில், ஒருவருக்காக ஒருவர் விட்டுக் கொடுப்பதும், தோழன் விலகும்போது தானும் விலகிச் செல்வதும் அரிதினும் அரிதான ஒரு விஷயம். தோனியும் ரெய்னாவும் வெறும் சக ஆட்டக்காரர்கள் அல்ல… அவர்கள் மைதானத்தில் எழுதியது கிரிக்கெட் வரலாறு மட்டுமல்ல, விட்டுக்கொடுத்தலின் ஆழமான அன்புக் காவியம்!
