இந்து சமய அறநிலையத்துறை அமைச்சர் ரமேஷ், தன்னைச் சந்திக்க வரும் தொண்டர்கள் மற்றும் பொதுமக்கள் அனைவருக்கும் மிக முக்கியமான, அதே நேரத்தில் சமூக அக்கறை கொண்ட கோரிக்கை ஒன்றை விடுத்துள்ளார். இதுதொடர்பாக அவர் தனது அதிகாரப்பூர்வ ‘எக்ஸ்’ சமூக வலைதளப் பக்கத்தில் வெளியிட்டுள்ள பதிவில், “அன்புள்ள அனைவருக்கும் அன்புடன் ஒரு வேண்டுகோள். என்னைச் சந்திக்க வருகின்ற அனைத்து அன்பு உள்ளங்களின் அன்பினையும் நான் மனப்பூர்வமாக உணர்கிறேன். அதே சமயத்தில், என்னைச் சந்திக்கும்போது பொன்னாடை அணிவிக்கும் வழக்கத்தை முற்றிலும் தவிர்த்துவிட்டு, அதற்குப் பதிலாகப் புத்தகங்களாக வழங்கினால் மிகவும் பயனுள்ளதாக இருக்கும் என்று குறிப்பிட்டுள்ளார்.

அமைச்சர் ரமேஷின் இந்த வித்தியாசமான மற்றும் முன்மாதிரியான வேண்டுகோள் அரசியல் வட்டாரத்திலும், பொதுமக்களிடையேயும் பெரும் வரவேற்பைப் பெற்றுள்ளது. மேலும் தனது பதிவில், “அவ்வாறு நீங்கள் அன்போடு வழங்கும் புத்தகங்களை நான் படிப்பதற்கும், கல்வி பயிலும் ஆர்வமுள்ள ஏழை எளிய மாணவ-மாணவிகளுக்கு அவற்றை நேரில் வழங்கி அவர்களின் கல்விக்கு வழிவகை செய்வதற்கும் பெரும் உதவியாக இருக்கும். எனவே, தயவுசெய்து இனி பொன்னாடைகளைத் தவிர்த்துவிட்டுப் புத்தகங்களை மட்டுமே வழங்குங்கள்! நன்றி!” என நெஞ்சாரக் கேட்டுக்கொண்டுள்ளார். ஆடம்பர வீண் செலவுகளைக் குறைத்து, மாணவர்களின் அறிவை வளர்க்கும் கல்விக்கு முக்கியத்துவம் கொடுக்கும் அமைச்சரின் இந்த அதிரடி முடிவு, தற்போது சமூக வலைதளங்களில் நெட்டிசன்களால் வெகுவாகப் பாராட்டப்பட்டு வைரலாகி வருகிறது.