டெல்லி மெட்ரோவின் ராஜீவ் சௌக் நிலையத்தில், பெண் திருடிகள் கும்பல் என்று சந்தேகிக்கப்படும் ஒரு குழுவை சூர்ஜ் பாட்டி என்ற நபர் வீடியோ எடுத்து சமூக வலைத்தளங்களில் பகிர்ந்துள்ளார். அந்த வீடியோவில், கூட்ட நெரிசலைப் பயன்படுத்தி மக்களின் போன் மற்றும் பர்ஸைத் திருடும் கும்பல் இது என அவர் பகிரங்கமாக எச்சரிக்கிறார். இதைக் கேட்டு ஆத்திரமடைந்த அந்தப் பெண்கள், அவரிடம் கடும் வாக்குவாதத்தில் ஈடுபட்டு, கையால் அடிக்கவும் செய்கின்றனர். அடுத்த ஸ்டேஷனில் இறங்கினால் செருப்பால் அடிப்போம் என அவர்கள் மிரட்ட, அந்த நபரோ தன்னிடம் பெல்ட் இருப்பதாகக் கூறி ஆவேசமாக மோதும் காட்சிகள் இணையத்தில் காட்டுத்தீயாய் பரவி வருகின்றன.
மெட்ரோ நிர்வாகம் இவர்களின் மீது எந்த நடவடிக்கையும் எடுப்பதில்லை என்றும், தனது புகாரால் தனது சோஷியல் மீடியா சேனலையே முடக்கிவிட்டதாகவும் அந்த நபர் குற்றம் சாட்டுகிறார். வீடியோவில் அந்தப் பெண்கள் கூட்டத்தோடு ஒட்டி நின்று செல்வது தெரிந்தாலும், அவர்கள் திருடுவதற்கான தெளிவான ஆதாரங்கள் அதில் இல்லை. ஆனாலும், மெட்ரோவில் பயணம் செய்பவர்கள் தங்களது உடமைகளை ஜாக்கிரதையாகப் பார்த்துக் கொள்ள வேண்டும் என அந்த வீடியோ மூலம் அவர் விழிப்புணர்வு ஏற்படுத்தி வருகிறார். இந்த மோதல் சம்பவம் இப்போது டெல்லி மக்களிடையே பெரும் பரபரப்பை ஏற்படுத்தியுள்ளது.
