அமெரிக்க அதிபர் டொனால்ட் டிரம்ப், வெள்ளை மாளிகைக்கு நேரில் வந்து உணவு வழங்கிய டெலிவரி பெண்ணுடன் உரையாடிய சம்பவம், அங்குள்ள அரசியல் வட்டாரத்தில் பெரும் பேசுபொருளாகியுள்ளது. கடந்த 72 மணிநேரமாக டிரம்பைச் சுற்றி நடந்து வரும் பல்வேறு அதிரடி மாற்றங்களுக்கு மத்தியில் இது ஒரு வினோதமான நிகழ்வாகப் பார்க்கப்படுகிறது.

திங்கட்கிழமை மதியம், வெள்ளை மாளிகையின் ஓவல் அலுவலக வாயிலுக்குச் செய்தியாளர்கள் அவசரமாக அழைக்கப்பட்டனர். அங்கு சிகப்பு நிற ஆடை அணிந்த ஷரோன் சிம்மன்ஸ் என்ற மெக்டொனால்ட்ஸ் டெலிவரி பெண் கதவைத் தட்ட, அதிபர் டிரம்ப் புன்னகையுடன் கதவைத் திறந்து இரண்டு பெரிய பைகளில் இருந்த சீஸ்பர்கர் மற்றும் பிரஞ்சு பிரைஸ் பார்சல்களைப் பெற்றுக்கொண்டார்.

உணவைப் பெற்றுக்கொண்ட டிரம்ப், அந்தப் பெண்ணை அங்கேயே இருக்கச் செய்து செய்தியாளர்களிடம் பேசினார். அப்போது அந்தப் பெண், டிரம்ப் கொண்டு வந்த ‘டிப்ஸ்களுக்கு வரி கிடையாது’  என்ற திட்டத்தைப் புகழ்ந்து பேசினார். கடந்த ஆண்டு சட்டமாக்கப்பட்ட “ஒன் பிக் பியூட்டிஃபுல் பில்” (One Big, Beautiful Bill) மூலம் தான் இப்போது பலன் பெற்று வருவதாக அவர் செய்தியாளர்களிடம் தெரிவித்தார்.

இந்த நிகழ்வு மிகவும் இயல்பாகக் காட்டப்பட்டாலும், இது நன்கு திட்டமிடப்பட்ட ஒரு விளம்பர யுக்தி என அரசியல் விமர்சகர்கள் கருதுகின்றனர். ஏனெனில், அதே நேரத்தில் அமெரிக்கா மற்றும் ஈரான் இடையே போர் பதற்றம் அதிகரித்து, ஹார்முஸ் ஜலசந்தியில்  அமெரிக்கா முற்றுகையைத் தொடங்கியுள்ளது.

மறுபுறம், டிரம்ப் தனது ‘ட்ரூத் சோஷியல்’ (Truth Social) பக்கத்தில், தன்னை ஏசு கிறிஸ்துவைப் போல சித்தரிக்கும் ஒரு செயற்கை நுண்ணறிவு (AI) புகைப்படத்தைப் பகிர்ந்துள்ளது நாடு முழுவதும் பெரும் சர்ச்சையை ஏற்படுத்தியுள்ளது.

டெலிவரி பைகளை கையில் வைத்திருந்தவாறே, ஈரான் போர் மற்றும் இதர அரசியல் விவகாரங்கள் குறித்து செய்தியாளர்களின் கேள்விகளுக்கு டிரம்ப் பதிலளித்தார். உலகமே போர்ப் பதற்றத்தில் இருக்கும் வேளையில், அதிபர் ஒரு டெலிவரி பெண்ணுடன் வரி விவகாரங்களைப் பேசி விளம்பரம் தேடிக்கொள்வது “டிரம்ப் உலகத்திற்கே” உரிய வினோதமான பாணி என ஊடகங்கள் விமர்சித்துள்ளன. மேலும் ஈரான் விவகாரம் மற்றும் ஏஐ புகைப்படச் சர்ச்சையில் இருந்து மக்களின் கவனத்தைத் திசைதிருப்பவே டிரம்ப் இந்த மெக்டொனால்ட்ஸ் நாடகத்தை அரங்கேற்றியதாக எதிர்க்கட்சிகள் குற்றம் சாட்டுகின்றன.