டெல்லியில் உள்ள புகழ்பெற்ற குரு தேக் பகதூர் (GTB) அரசு மருத்துவமனையின் அவசர சிகிச்சைப் பிரிவில் (Emergency Ward) அரங்கேறியுள்ள இந்த அதிர்ச்சி சம்பவம், ஒட்டுமொத்த மருத்துவத் துறையையும், அரசு நிறுவனங்களின் உள்கட்டமைப்பு வசதிகளையும் பெரிய அளவில் கேள்விக்குறியாக்கியுள்ளது. உயிருக்கு உத்தரவாதம் தேடி மருத்துவமனைக்கு வரும் நோயாளிகளுக்கு, அங்குள்ள மின்விசிறியே எமனாக மாறும் என்ற அவல நிலையை இந்தச் சம்பவம் வெளிச்சம் போட்டுக் காட்டியுள்ளது.
டெல்லியைச் சேர்ந்த 42 வயதான முகமது அக்பர் என்ற நோயாளி, கடுமையான இரத்த அழுத்தம் மற்றும் மூளைக்காய்ச்சல் பாதிப்பு காரணமாக கடந்த ஜூலை 18ஆம் தேதி இந்த மருத்துவமனையில் அனுமதிக்கப்பட்டார். தீவிர சிகிச்சைப் பிரிவில் அவருக்கு மருத்துவர்கள் சிகிச்சை அளித்து வந்த நிலையில், சனிக்கிழமை இரவு சுமார் 9:30 மணியளவில் யாரும் எதிர்பாராத pஒரு விபரீதம் நிகழ்ந்தது. அவர் படுத்திருந்த படுக்கைக்கு நேர் மேலே ஓடிக்கொண்டிருந்த கூரை மின்விசிறி (Ceiling Fan) திடீரென கழன்று, நேராக அவர் மீது விழுந்தது.
இந்தக் கொடூர விபத்தில், நோயாளி முகமது அக்பர் அலறியபடியே படுகாயமடைந்தார். அதுமட்டுமன்றி, அந்த நேரத்தில் அவருக்குச் சிகிச்சை அளித்துக் கொண்டிருந்த நர்சிங் அதிகாரியும் இந்த விபத்தில் காயமடைந்தார். மின்விசிறி விழுந்த அதிர்ச்சியிலும், ஏற்பட்ட பலத்த காயங்களினாலும் பாதிக்கப்பட்ட நோயாளி, விபத்து நடந்த சில மணி நேரங்களிலேயே சிகிச்சை பலனின்றி பரிதாபமாக உயிரிழந்தார். குணமடைந்து வீடு திரும்புவார் என்று நம்பிய குடும்பத்தினர், மருத்துவமனையின் அலட்சியத்தால் பிணமாக மீட்டெடுக்கப்பட்ட அவலம் அங்கிருந்தவர்களைக் கண்ணீரில் ஆழ்த்தியது.
இந்தச் சம்பவம் சமூக வலைத்தளங்களில் பரவியதைத் தொடர்ந்து, அரசு மருத்துவமனைகளின் தரம் மற்றும் பாதுகாப்பு குறித்த கடுமையான விவாதங்கள் எழுந்துள்ளன. பல கோடி ரூபாய் செலவில் கட்டப்படும் அரசு மருத்துவமனைகளில், அடிப்படை உள்கட்டமைப்புகள் கூட சரியாகப் பராமரிக்கப்படுவதில்லை என்பதற்கு இந்தச் சம்பவமே சாட்சி என்று பொதுமக்கள் குற்றம் சாட்டுகின்றனர். இந்த விபத்து குறித்து உயர்மட்ட விசாரணைக்கு உத்தரவிடப்பட்டுள்ள நிலையில், அலட்சியமாகச் செயல்பட்ட அதிகாரிகள் மீது கடுமையான நடவடிக்கை எடுக்க வேண்டும் என்ற கோரிக்கை வலுத்து வருகிறது.
