கடந்த 2026 சட்டமன்றத் தேர்தல் தோல்விக்குப் பிறகு திமுக மற்றும் காங்கிரஸ் கூட்டணிக்குள் புகைந்து கொண்டிருந்த உட்கட்சிப் பூசல், தற்பொழுது எரிமலை போல வெடித்துச் சிதறியுள்ளது. காங்கிரஸ் எம்பியான மாணிக்கம் தாகூர் தனது எக்ஸ் (ட்விட்டர்) பக்கத்தில், திமுக தலைவர் மு.க.ஸ்டாலினை “அண்ணன்” என்று குறிப்பிட்டு, மிகக் கடுமையான வார்த்தைகளால் சாடி அனல் பறக்கும் அறிக்கை ஒன்றை வெளியிட்டுள்ளார். திமுகவின் வரலாற்றுச் சரிவிற்குத் தனது குடும்பத்தினரின் தவறுகள்தான் காரணம் என்பதை மறைக்க, தற்பொழுது காங்கிரஸை பலிகடாவாக்க மு.க.ஸ்டாலின் முயற்சி செய்வதாக அவர் ஓப்பனாகக் குற்றம் சாட்டியுள்ளார்.

​திமுக ஆட்சி வெறும் 59 இடங்களுக்குச் சுருங்கி, முதலமைச்சர் மு.க.ஸ்டாலின் மற்றும் 15 அமைச்சர்கள் மக்களால் மிகக் கொடூரமாக நிராகரிக்கப்பட்டதற்கு ஊழல், வசூல் மற்றும் ஆணவம்தான் காரணம் என்று மாணிக்கம் தாகூர் பொங்கியுள்ளார். தனது மகன் உதயநிதி மற்றும் மருமகன் சபரீசன் ஆகியோரின் அரசியல் தவறுகளை மறைக்கவும், தவெக தலைவர் விஜய் தலைமையிலான புதிய அரசுக்கு காங்கிரஸ் உறுதுணையாக நின்ற கோபத்திலும்தான் திமுக தற்பொழுது காங்கிரஸ் மீது பழி போடுவதாக அவர் விளாசியுள்ளார்.

மேலும், பாஜக ஆதரவுடன் எடப்பாடி பழனிசாமி ஆட்சி அமைக்கப் பார்த்த திட்டத்திற்கு காங்கிரஸ் முற்றுப்புள்ளி வைத்ததால் வந்த ஆத்திரம் இது என்றும், சுயபரிசோதனை செய்யாமல் மகனைக் காக்க ஸ்டாலின் செய்யும் இந்த திசைதிருப்பும் அரசியல் நீண்ட நாள் உதவாது என்றும் அவர் சவால் விடுத்துள்ளார். இந்த அதிரடிப் பேச்சு தற்பொழுது திமுக – காங்கிரஸ் கூட்டணியின் மொத்த அஸ்திவாரத்தையும் உலுக்கியெடுத்துள்ளது.