அதிமுக அரசியலில் ஓபிஎஸ் அணியின் மிக முக்கியமான தூண்களாகக் கருதப்பட்ட வைத்திலிங்கம், மனோஜ் பாண்டியன் மற்றும் மருது அழகுராஜ் ஆகியோர் அடுத்தடுத்து திமுகவில் இணைந்துள்ளது அரசியல் வட்டாரத்தில் பெரும் பரபரப்பை ஏற்படுத்தியுள்ளது. எடப்பாடி பழனிசாமிக்கு எதிராக ஓபிஎஸ் நடத்திய தர்மயுத்தத்தில் அவருக்குத் தோளோடு தோள் நின்ற மூத்த தலைவர்கள் இப்போது அறிவாலயத்தை நோக்கிப் படையெடுத்திருப்பது அதிமுக தொண்டர்களிடையே அதிர்ச்சியை ஏற்படுத்தியுள்ளது. தங்களின் அரசியல் எதிர்காலத்தைக் கருத்தில் கொண்டு, எடப்பாடியை வீழ்த்த திமுகவே சரியான தளம் என அவர்கள் முடிவு செய்திருப்பதாகத் தெரிகிறது.
இந்நிலையில், “ஓபிஎஸ் அவர்களும் விரைவில் ஒரு நல்ல முடிவை எடுப்பார்” என திமுகவில் இணைந்த வைத்திலிங்கம் ஒரு குண்டைத் தூக்கிப் போட்டுள்ளார். இதனால், தனது ஆதரவாளர்களைத் தொடர்ந்து ஓபிஎஸ் அவர்களும் விரைவில் திமுகவில் இணையக்கூடும் என்ற பேச்சு பலமாக எழுந்துள்ளது. இதற்கான பேச்சுவார்த்தைகள் மறைமுகமாக நடந்து வருவதாகவும், விரைவில் ஓபிஎஸ் தரப்பிலிருந்து ஒரு அதிரடி அறிவிப்பு வெளியாகலாம் என்றும் கூறப்படுகிறது. ஒருவேளை இது நடந்தால், அது தமிழக அரசியலில் யாரும் எதிர்பார்க்காத ஒரு மிகப்பெரிய திருப்புமுனையாக அமையும் என்பதில் சந்தேகமில்லை.
