1965-ஆம் ஆண்டு தமிழகத்தில் நடைபெற்ற இந்தி எதிர்ப்புப் போராட்டத்தை மையமாகக் கொண்டு வெளியாகியுள்ள ‘பராசக்தி’ திரைப்படத்தை வெறும் பொழுதுபோக்கு அம்சமாக மட்டுமே பார்க்க வேண்டும் என்று அதிமுக பொதுச்செயலாளர் எடப்பாடி பழனிசாமி தெரிவித்துள்ளார்.

சுதா கொங்கரா இயக்கத்தில் சிவகார்த்திகேயன், ஜெயம் ரவி, அதர்வா மற்றும் ஸ்ரீலீலா நடிப்பில் வெளியாகியுள்ள திரைப்படம் ‘பராசக்தி’. தமிழக வரலாற்றில் முக்கியத்துவம் வாய்ந்த 1965-ஆம் ஆண்டு இந்தி எதிர்ப்புப் போராட்டக் களத்தை இப்படம் விவரிக்கிறது. மொழிப்போர் தியாகிகளின் தியாகத்தைப் போற்றும் வகையில் அமைந்துள்ளதால், திமுகவினர் மற்றும் தமிழ் ஆர்வலர்கள் மத்தியில் இப்படத்திற்கு ஆதரவு பெருகியுள்ளது.

அதேசமயம், இப்படம் அரசியல் ரீதியான சில சர்ச்சைகளையும் கிளப்பியுள்ளது. 1965-களில் மத்தியில் காங்கிரஸ் ஆட்சி நடைபெற்றதால், போராட்டத்தை ஒடுக்க அரசு கையாண்ட முறைகள் படத்தில் காட்சிப்படுத்தப்பட்டுள்ளன. குறிப்பாக:மறைந்த பிரதமர் இந்திரா காந்தி குறித்த கதாபாத்திரம் படத்தில் சிறுமைப்படுத்தப்பட்டுள்ளதாக காங்கிரஸ் தரப்பில் குற்றச்சாட்டு எழுந்துள்ளது.

பராசக்தி படக்குழுவினர் சமீபத்தில் பிரதமர் மோடி பங்கேற்ற பொங்கல் விழாவில் கலந்துகொண்டதும் அக்கட்சியினரை அதிருப்தியில் ஆழ்த்தியுள்ளது.

சென்னையில் இன்று செய்தியாளர்களைச் சந்தித்த எதிர்க்கட்சித் தலைவர் எடப்பாடி பழனிசாமியிடம், இப்படம் குறித்து எழும் சர்ச்சைகள் குறித்து கேள்வி எழுப்பப்பட்டது. அதற்கு அவர் அளித்த பதிலாவது:

“பராசக்தி திரைப்படத்தை வெறும் பொழுதுபோக்கான திரைப்படமாக மட்டுமே பார்க்க வேண்டும். அந்த காலகட்டத்தில் அதிமுக தனியாகப் பிரியவில்லை; திமுகவும் அதிமுகவும் ஒன்றாகவே இருந்தன. நமது தாய்மொழியான தமிழைக் காக்க முன்னோர்கள் பல போராட்டங்களை நடத்தியுள்ளனர். அந்த வரலாற்றுப் பின்னணியை வைத்துத் தான் இந்தப் படம் எடுக்கப்பட்டுள்ளது. மொழிப்போர் தியாகிகளுக்கு அதிமுக ஆண்டுதோறும் உரிய மரியாதை செய்து வருகிறது.”

அதிமுக பொதுச்செயலாளரின் இந்த நிதானமான கருத்து, சிவகார்த்திகேயன் ரசிகர்களிடையே மகிழ்ச்சியை ஏற்படுத்தியுள்ளது.

தணிக்கைக் குழுவின் அனுமதி கிடைக்காததால் நடிகர் விஜய்யின் ‘ஜனநாயகன்’ திரைப்படம் வெளியாகாத நிலையில், அந்த விரக்தியில் இருக்கும் ஒரு தரப்பு ரசிகர்கள் ‘பராசக்தி’ படத்தைக் கடுமையாக விமர்சித்து வருகின்றனர். இருப்பினும், அதிமுக மற்றும் பாஜக தரப்பில் படத்திற்குப் பெரிய அளவில் எதிர்ப்பு கிளம்பவில்லை என்பது குறிப்பிடத்தக்கது.