மத்திய பொது பட்ஜெட் வரும் பிப்ரவரி 1-ஆம் தேதி நாடாளுமன்றத்தில் தாக்கல் செய்யப்பட உள்ளது. மத்திய நிதியமைச்சர் நிர்மலா சீதாராமன் தனது 9-வது பட்ஜெட்டைத் தாக்கல் செய்வதன் மூலம், இந்திய நாடாளுமன்ற வரலாற்றில் ஒரு புதிய மைல்கல்லை எட்டவுள்ளார்.

பிரதமர் நரேந்திர மோடி தலைமையிலான அமைச்சரவையில், ஒரே பிரதமரின் கீழ் தொடர்ந்து 9 முறை பட்ஜெட் தாக்கல் செய்யும் முதல் நிதியமைச்சர் என்ற பெருமையை நிர்மலா சீதாராமன் பெறுகிறார். 2019-ஆம் ஆண்டு நாட்டின் முதல் முழுநேரப் பெண் நிதியமைச்சராகப் பொறுப்பேற்ற அவர், 2024-இல் மீண்டும் அதே பொறுப்பினைப் பெற்றுத் தொடர்ந்து தனது பணிகளை முன்னெடுத்து வருகிறார்.

இந்திய வரலாற்றில் அதிகமுறை பட்ஜெட் தாக்கல் செய்தவர்களின் பட்டியலில் முன்னாள் பிரதமர் மொரார்ஜி தேசாய் முதலிடத்தில் உள்ளார். எனினும், நிர்மலா சீதாராமனின் இந்த 9-வது பட்ஜெட், தொடர்ச்சியாக ஒரே பிரதமரின் கீழ் என்பது குறிப்பிடத்தக்கது.

சுதந்திர இந்தியாவின் முதல் பட்ஜெட்டை 1947-ஆம் ஆண்டு நவம்பர் 26-ஆம் தேதி தமிழகத்தைச் சேர்ந்த ஆர்.கே. சண்முகம் செட்டி தாக்கல் செய்தார் என்பது குறிப்பிடத்தக்கது. அதற்குப் பிறகு பல நிதியமைச்சர்கள் பல்வேறு பொருளாதாரச் சூழல்களில் பட்ஜெட்டுகளைத் தாக்கல் செய்திருந்தாலும், தற்போதைய நிதியமைச்சர் நிர்மலா சீதாராமன் படைக்கவுள்ள சாதனை முக்கியத்துவம் வாய்ந்ததாகக் கருதப்படுகிறது. மேலும் வருகிற பிப்ரவரி 1-ஆம் தேதி தாக்கல் செய்யப்படவுள்ள இந்த 9-வது பட்ஜெட் மீது நாடு முழுவதும் பெரும் எதிர்பார்ப்பு நிலவி வருகிறது.