மத்திய அரசின் புதிய பணப்பரிவர்த்தனை சட்டத்திருத்த மசோதாவால், இனி கூகுள் பே, போன்பே போன்ற யு.பி.ஐ பரிவர்த்தனைகளுக்கு அதிக கட்டணம் வசூலிக்கப்படும் என்று தகவல்கள் வெளியாகியது. புதிய விதிமுறைகளின் படி, சாதாரண நுகர்வோர்கள் மற்றும் சிறிய மளிகைக்கடை வியாபாரிகள் யாரும் எந்தவித கட்டணமும் அல்லது வணிகர் தள்ளுபடி கட்டணமும் செலுத்தத் தேவையில்லை என்று இந்திய பணம் செலுத்துதல் கவுன்சில் திட்டவட்டமாக அறிவித்துள்ளது. இதனால் அன்றாட காய்கறி வாங்குவது முதல் சூப்பர் மார்க்கெட் ஷாப்பிங் வரை அனைத்து டிஜிட்டல் பரிவர்த்தனைகளும் வழக்கம்போல முற்றிலும் இலவசமாகவே தொடரும் என்பது கோடிக்கணக்கான பயனர்களுக்கு மிகப்பெரிய நிம்மதியைக் கொடுத்துள்ளது.

நுகர்வோருக்கு எவ்வித சுமையும் தராமல், குறிப்பிட்ட அளவுக்கு மேல் வர்த்தகம் செய்யும் பெரிய நிறுவனங்களுக்கு மட்டும் குறைந்த அளவிலான எம்.டி.ஆர் கட்டணம் வசூலிக்க மத்திய அரசு திட்டமிட்டுள்ளது. கடந்த பத்தாண்டுகளாக யு.பி.ஐ தளத்தின் சைபர் பாதுகாப்பு, மோசடி தடுப்பு மற்றும் தொழில்நுட்ப உள்கட்டமைப்புகளை மேம்படுத்த வங்கிகளும் ரிசர்வ் வங்கியும் கோடிக்கணக்கில் முதலீடு செய்துள்ள நிலையில், இந்த சேவைகளின் தொடர் வளர்ச்சியை உறுதிப்படுத்தவே இந்த நடவடிக்கை எடுக்கப்பட்டுள்ளதாக மத்திய நிதி அமைச்சர் நிர்மலா சீதாராமன் விளக்கம் அளித்துள்ளார்

. சாதாரண மக்களின் கைபேசி பணப்பரிமாற்றங்களை எவ்விதத்திலும் பாதிக்காமல், பெருவணிகர்களை மட்டும் இந்த கட்டண வரம்பிற்குள் கொண்டுவருவது டிஜிட்டல் பொருளாதாரத்தின் பாதுகாப்பை மேலும் பலப்படுத்தும் என்று எதிர்பார்க்கப்படுகிறது.

வரி மற்றும் பிற சட்டங்கள் திருத்த மசோதா 2026 நாடாளுமன்றத்தில் முழுமையாக நிறைவேற்றப்பட்ட பின்னரே, கட்டண விகிதங்கள் குறித்த இறுதி முடிவுகள் எடுக்கப்படும் என்று தேசிய பணப்பரிவர்த்தனை கழகத்தின் வழிகாட்டுதலோடு மத்திய அரசு தெளிவுபடுத்தியுள்ளது. தற்போதைய சூழலில் எந்த ஒரு கட்டணமும் உடனடியாக அமலுக்கு வரவில்லை என்பதால், வதந்திகளை நம்பி பொதுமக்கள் யாரும் குழப்பமடையத் தேவையில்லை என்று கேட்டுக்கொள்ளப்பட்டுள்ளனர்.

உலகளவில் இந்தியாவின் டிஜிட்டல் பரிவர்த்தனை சாதனை தொடரவும், உலகத்தரம் வாய்ந்த உள்கட்டமைப்பை தடையின்றி பராமரிக்கவும் இந்த எதிர்கால திட்டமிடல் உறுதுணையாக இருக்கும் என்று நிதித்துறை வட்டாரங்கள் தெரிவிக்கின்றன.