நூற்றாண்டு காலமாக இந்தியச் சமூகத்தில் ‘திருமணம்’ என்பது புனிதமான பிணைப்பாகக் கருதப்பட்டு வந்தது. ஆனால், சமீபகாலமாக நீதிமன்றங்களில் குவிந்து வரும் விவாகரத்து வழக்குகளும், சிதைந்து வரும் குடும்ப உறவுகளும் அந்த நம்பிக்கையை மெல்ல மெல்ல அசைத்துப் பார்க்கின்றன. இதற்குச் சான்றாக, தற்போது சமூக வலைதளங்களில் பரவி வரும் ஒரு வீடியோ காண்போரின் நெஞ்சை கலங்க  செய்துள்ளது.

சமூக வலைதளங்களில் வைரலாகி வரும் அந்த வீடியோவில், நடுத்தர வயதுடைய நபர் ஒருவர், தான் பெரும் பாடுபட்டுச் சம்பாதித்த நிலத்தை விற்று, அதிலிருந்து கிடைத்த பணத்தைத் தனது மனைவிக்கு ‘ஜீவனாம்சம்’ எனப்படும் பராமரிப்புத் தொகையாக வழங்குகிறார். ஒரு சாமானிய மனிதனுக்கு ‘நிலம்’ என்பது வெறும் மண் அல்ல; அது அவனது வாழ்வாதாரம், கௌரவம் மற்றும் எதிர்காலக் கனவு. வெயில், மழை பாராது உழைத்து, தன் சந்ததிக்காகச் சேர்த்து வைத்த அந்தச் சொத்தை, இன்று முறிந்த உறவின் விலையாகக் கொடுக்க வேண்டிய கட்டாயத்திற்கு அவர் தள்ளப்பட்டுள்ளார்.

பணத்தை மனைவியிடம் ஒப்படைக்கும்போது அந்த நபரின் கண்களில் தேங்கியிருந்த கண்ணீரும், அவரது முகத்தில் தெரிந்த அந்த இயலாமையும் பார்ப்பவர்களை நிலைகுலையச் செய்துள்ளது. அவரது கண்ணில் ஒரு அழகான குடும்பத்தை உருவாக்க முடியவில்லையே என்ற ஆதங்கம். நிலத்தை உழுது, நிம்மதியாக வாழ நினைத்த ஆசை இன்று காகிதப் பணமாக மாறிப்போன வேதனை. பல ஆண்டு கால உழைப்பு, இன்று ஒரு கையெழுத்தில் மற்றவர் வசமாவதைக் காணும் துயரம்.

“ஆண்களின் கண்ணீருக்குச் சட்டத்தில் மதிப்பிருக்கிறதோ இல்லையோ, ஆனால் அந்த மனவேதனையை அளக்க எந்தக் கருவியும் இல்லை” என நெட்டிசன்கள் பலரும் இந்த வீடியோவின் கீழ் கருத்து தெரிவித்து வருகின்றனர். பெண்களின் பாதுகாப்பு மற்றும் வாழ்வாதாரத்திற்காக ஜீவனாம்சம் வழங்குவது சட்டப்படி கட்டாயமானது என்றாலும், அதற்காக ஒரு மனிதனைப் பொருளாதார ரீதியாகவும், மன ரீதியாகவும் முழுமையாகச் சிதைப்பது எந்த வகையில் நியாயம் என்ற விவாதம் தற்போது சமூக வலைதளங்களில் சூடுபிடித்துள்ளது.

ஒரு விவசாயி அல்லது நடுத்தர வர்க்க மனிதன் தனது நிலத்தை இழப்பது என்பது, தனது உடல் உறுப்பை இழப்பதற்குச் சமமான வலியாகும். உறவுகள் முறியும்போது, ஏன் ஆண்கள் மட்டுமே பொருளாதார ரீதியாகத் தண்டிக்கப்படுகிறார்கள் என்ற கேள்வியும் எழுப்பப்பட்டு வருகிறது. வாழ்க்கையில் இழந்த பணத்தை மீண்டும் சம்பாதித்துவிடலாம், ஆனால் இழந்த காலத்தையும், நம்பிக்கையையும் யாராலும் மீட்டுத் தர முடியாது. அந்த நபர் தனது நிலத்தை விற்றுப் பணம் கொடுத்த தருணம், அவருக்கு ஒரு மரணத்தை விடக் கொடியதாக இருந்திருக்கக்கூடும்.

மேலும் சட்ட அமைப்புகள் இத்தகைய விவகாரங்களை வெறும் ‘புள்ளிவிவரங்களாக’ மட்டும் பார்க்காமல், அதன் பின்னணியில் இருக்கும் மனித உணர்வுகளையும் கருத்தில் கொள்ள வேண்டும் என்பதே சமூக ஆர்வலர்களின் கோரிக்கையாக உள்ளது. அந்த மனிதனின் கண்ணீர் துளிகள், சிதைந்து வரும் இன்றைய காலத்து உறவுகளுக்கு ஒரு மௌன சாட்சியாக நிற்கின்றன.