அதிமுக கூட்டணியில் டிடிவி தினகரன் இணைந்திருக்கும் சூழலில், இது குறித்து அக்கட்சியின் மூத்த தலைவரான செங்கோட்டையன் மிகுந்த அதிருப்தியில் இருப்பதாகத் தகவல்கள் கசிந்துள்ளன. “இதைத்தான் அப்போதே எடப்பாடி பழனிசாமியிடம் செய்யச் சொன்னேன், ஆனால் என் பேச்சைக் கேட்காமல் என்னை ஓரங்கட்டி வெளியே அனுப்பிவிட்டாரே” என்று அவர் தனது நெருங்கிய வட்டாரத்தில் புலம்பித் தீர்த்ததாகக் கூறப்படுகிறது. செங்கோட்டையன் அதிமுகவிலிருந்து விலகி தமிழக வெற்றிக் கழகத்தில் இணைந்த நிலையில், தற்போது அதிமுகவில் ஏற்பட்டுள்ள இந்த திடீர் கூட்டணி மாற்றங்கள் அவருக்கு ஒருவித அரசியல் ஆதங்கத்தை ஏற்படுத்தியுள்ளதாகத் தெரிகிறது.
மறுபுறம், தமிழக வெற்றிக் கழகத்தில் (தவெக) இணைந்து சில மாதங்கள் கடந்தும், செங்கோட்டையனுக்கு இதுவரை எந்தவொரு முக்கியப் பொறுப்பும் வழங்கப்படவில்லை என்பது அவரது ஆதரவாளர்களிடையே பெரும் கொந்தளிப்பை ஏற்படுத்தியுள்ளது. அவரை நம்பி தவெக-விற்கு வந்த நிர்வாகிகள், தங்களுக்கு உரிய அங்கீகாரம் கிடைக்காததால் அதிருப்தியில் இருப்பதாகக் கூறப்படுகிறது. இந்தச் சூழல் செங்கோட்டையனுக்கு இரட்டிப்பு நெருக்கடியை ஏற்படுத்தியுள்ளது. ஒருபக்கம் அதிமுகவின் புதிய நகர்வுகள், மறுபக்கம் தவெக-வில் நிலவும் மௌனம் எனச் செங்கோட்டையனின் அரசியல் பயணம் தற்போது ஒரு இக்கட்டான கட்டத்தை எட்டியுள்ளதாக அரசியல் விமர்சகர்கள் கருதுகின்றனர்.
