மத்தியப் பிரதேசத்தின் நர்சிங்பூரில் நடந்த ஒரு கொடூரமான கொலை வழக்கை போலீசார் முடிவுக்குக் கொண்டு வந்துள்ளனர். இந்தக் கொலையைச் செய்தவர், இறந்தவரின் மைத்துனி (மனைவியின் தங்கை) நிதி சாஹு ஆவார். நிதியும், அவரது அக்கா கணவரான சீஜன் சாஹுவும் திருமணம் ஆவதற்கு முன் ரகசிய உறவில் இருந்துள்ளனர். நிதிக்குத் திருமணமாகி ஐந்து மாதங்கள் ஆன நிலையில், சீஜன், தங்கள் பழைய தனிப்பட்ட வீடியோக்களை வெளியிட்டு விடுவதாக நிதியை பிளாக்மெயில் செய்து பணம் கேட்டு மிரட்டி வந்தார். இந்த மிரட்டலில் இருந்து எப்படியாவது விடுபட வேண்டும் என முடிவு செய்த நிதி, சீஜனைக் கொன்றுவிடத் திட்டம் தீட்டினார்.

நிதியின் இந்தக் கொலைத் திட்டத்திற்கு ஒரு சுவாரஸ்யமான பின்னணி உள்ளது. தான் மிரட்டப்படுவதால் ஏற்பட்ட மன உளைச்சலில், நிதி சமூக வலைதளங்களில் வந்த கொலை தொடர்பான ரீல்ஸ் (Reels) மற்றும் வீடியோக்களைப் பார்த்து இந்தக் கொலையை எப்படிச் செய்வது என்று கற்றுக்கொண்டார். இரண்டு கத்திகளை வாங்கி மறைத்து வைத்த அவர், தனது நண்பரான சஹில் என்பவரை அணுகி, சீஜனைக் கொல்வதற்காக ₹50,000 சுபாரி பேசினார். முன்பணமாக ₹10,000 கொடுத்த நிதி, மீதியைத் தனது நகைகளைக் கொடுத்துத் தீர்க்க முடிவு செய்தார். அக்டோபர் 25 அன்று, சீஜனை காரில் அழைத்துச் சென்றபோது, முதலில் நிதி கத்தியால் தாக்க, பிறகு சஹில் சேர்ந்து குத்திக் கொன்றனர்.

சீஜன் காணாமல் போனது குறித்துப் போலீசில் புகார் அளிக்கப்பட்டது. போலீசார் சீஜனின் செல்போன் இருப்பிடம் மற்றும் சிசிடிவி காட்சிகளை ஆய்வு செய்தபோது, ஒரு காரில் முகமூடி அணிந்திருந்த நிதியையும், சஹிலையும் கண்டறிந்தனர். மூன்று சிறப்புப் போலீஸ் குழுக்கள் இரவும் பகலும் தேடி, வனப்பகுதியில் கற்களுக்கு அடியில் புதைக்கப்பட்டிருந்த சடலத்தைக் கண்டுபிடித்தனர். பிளாக்மெயிலில் இருந்து தப்பிக்கவே இந்தக் கொலையைச் செய்ததாக நிதி ஒப்புக்கொண்டார். இந்தக் கொலையைத் துப்பு துலக்கிய போலீஸ் குழுவுக்கு ₹10,000 பரிசும் வழங்கப்பட்டது. நிதி உட்பட மூன்று பேர் கைது செய்யப்பட்டு, இந்த மர்மம் முழுமையாக அவிழ்ந்தது.