கன்னியாகுமரி மாவட்டத்தில் கடந்த நவம்பர் 4 முதல் டிசம்பர் 14 வரை நடைபெற்று வந்த வாக்காளர் பட்டியல் சிறப்புத் தீவிர திருத்தப் பணிகள் (SIR) நிறைவடைந்த நிலையில், புதிய வரைவு வாக்காளர் பட்டியலை மாவட்ட ஆட்சியர் இன்று வெளியிட்டுள்ளார். மாவட்டத்தில் உள்ள 6 சட்டமன்றத் தொகுதிகளிலும் வாக்காளர் பட்டியலைத் தூய்மைப்படுத்தும் நோக்கில் மேற்கொள்ளப்பட்ட இந்த அதிரடி நடவடிக்கையால், வாக்காளர்களின் எண்ணிக்கையில் மிகப்பெரிய மாற்றம் ஏற்பட்டுள்ளது.

​முன்னதாக 15,92,872 ஆக இருந்த மொத்த வாக்காளர்களின் எண்ணிக்கையில், தகுதியற்றவர்கள் மற்றும் முகவரி மாறியவர்கள் என சுமார் 1,53,373 பெயர்கள் அதிரடியாக நீக்கப்பட்டுள்ளன. இதன் விளைவாக, குமரி மாவட்டத்தின் தற்போதைய வாக்காளர் எண்ணிக்கை 14,39,499 ஆகக் குறைந்துள்ளது. தேர்தல் ஆணையத்தின் விதிமுறைகளின்படி, இறந்தவர்கள் மற்றும் இரட்டைப் பதிவுகளை நீக்கிப் பட்டியலைச் செம்மைப்படுத்தும் பணி வெற்றிகரமாக முடிக்கப்பட்டுள்ளதாக மாவட்ட நிர்வாகம் தெரிவித்துள்ளது.