பொருளாதார நெருக்கடியில் சிக்கித் தவிக்கும் அண்டை நாடான இலங்கையில், பெட்ரோல் மற்றும் டீசல் விலை வரலாறு காணாத அளவில் மீண்டும் உயர்த்தப்பட்டுள்ளது பொதுமக்களிடையே பெரும் அதிர்ச்சியை ஏற்படுத்தியுள்ளது.

இலங்கை அரசு எடுத்துள்ள இந்தத் திடீர் முடிவால், பெட்ரோல் விலை ஒரே நாளில் லிட்டருக்கு 25 ரூபாய் வரை அதிரடியாக உயர்ந்துள்ளது. இதன் மூலம் ஒரு லிட்டர் பெட்ரோல் தற்போது 398 ரூபாய்க்கு விற்பனை செய்யப்படுவதால், வாகன ஓட்டிகள் நிலைகுலைந்து போயுள்ளனர்.

இதேபோல் டீசல் விலையும் கணிசமாக உயர்த்தப்பட்டுள்ளதால், போக்குவரத்துச் செலவுகள் அதிகரித்து அத்தியாவசியப் பொருட்களின் விலையும் உயரும் அபாயம் ஏற்பட்டுள்ளது.

ஏற்கனவே உணவுப் பொருட்கள் மற்றும் மருந்து தட்டுப்பாட்டால் அவதிப்பட்டு வரும் இலங்கை மக்களுக்கு, இந்த எரிபொருள் விலை உயர்வு “வெந்த புண்ணில் வேல் பாய்ச்சுவது போல” அமைந்துள்ளது.

அந்நியச் செலாவணி கையிருப்பு குறைந்ததே இந்த விலை உயர்வுக்கு முக்கியக் காரணமாகச் சொல்லப்படும் நிலையில், சாதாரண மக்கள் தங்களது அன்றாட வாழ்க்கையை நடத்த முடியாமல் தவித்து வருகின்றனர்.