அதிமுக பொதுச்செயலாளர் எடப்பாடி பழனிசாமி அவர்கள், வேலைவாய்ப்புக்காகக் காத்திருக்கும் இளைஞர்கள் மற்றும் உழைக்கும் வர்க்கத்தினரைக் கவரும் வகையில் அதிரடி வாக்குறுதிகளை அறிவித்துள்ளார். இதன்படி, வேலைவாய்ப்பு அலுவலகத்தில் பதிவு செய்துள்ள பட்டதாரிகளுக்கு மாதம் ₹2,000 மற்றும் பிளஸ் டூ முடித்தவர்களுக்கு ₹1,000 உதவித்தொகை வழங்கப்படும் என உறுதியளித்துள்ளார். மேலும், நெசவாளர்களின் வாழ்வாதாரத்தை மேம்படுத்த கைத்தறி நெசவாளர்களுக்கு 450 யூனிட் வரையிலும், விசைத்தறி நெசவாளர்களுக்கு 1,400 யூனிட் வரையிலும் இலவச மின்சாரம் உயர்த்தி வழங்கப்படும் என்று அறிவித்துள்ளார்.

​மீனவர்கள் மற்றும் சிறு வியாபாரிகளின் நலன் கருதி, மீன்பிடி தடைக்கால நிவாரணத் தொகையை ₹12,000-ஆக உயர்த்துவதாகவும், நடைபாதை வியாபாரிகள் கூட்டுறவு வங்கிகளில் வாங்கிய கடன்கள் அனைத்தும் முழுமையாகத் தள்ளுபடி செய்யப்படும் என்றும் எடப்பாடியார் தெரிவித்துள்ளார். இதுமட்டுமின்றி, ஆண்டுதோறும் பொங்கல் தொகுப்புடன் கூடுதலாக ₹1,000 ரொக்கம் வழங்கப்படும் என்ற அறிவிப்பையும் அவர் வெளியிட்டுள்ளார். இந்த மெகா சலுகைகள் அனைத்தும் அதிமுக ஆட்சிக்கு வந்தவுடன் போர்க்கால அடிப்படையில் நிறைவேற்றப்படும் என அவர் உறுதிபடத் தெரிவித்துள்ளார்.