உத்தரப் பிரதேச மாநிலம் சுல்தான்பூர் மாவட்ட எஸ்.பி-யாக இருப்பவர் சாரு நிகம். 2013-ஆம் ஆண்டு பேட்ச் ஐபிஎஸ் அதிகாரியான இவர், தனது நேர்மையான மற்றும் அதிரடியான நடவடிக்கைகளுக்குப் பெயர் பெற்றவர். சமீபத்தில் ஒரு குற்றச் சம்பவம் தொடர்பாக அவர் ஊடகங்களுக்குப் பேட்டியளித்துக் கொண்டிருந்தபோது, அவருக்குப் பின்னால் நின்றிருந்த ஒரு தரோகா (சப்-இன்ஸ்பெக்டர்) செல்போனில் பேசிக் கொண்டிருந்தார். இதனால் ஆத்திரமடைந்த சாரு நிகம், “அட, நீயே வந்து பேசிக்கோயா!” என்று கடுமையாகச் சத்தமிட்டார். இந்த வீடியோ தற்போது சமூக வலைதளங்களில் வைரலாகி வருகிறது.

​சாரு நிகம் ஏற்கனவே பல அதிரடிச் சம்பவங்களால் புகழ்பெற்றவர். 2023-ல் ஒரு கொள்ளைச் சம்பவத்தில் சம்பந்தப்பட்ட ஒரு இன்ஸ்பெக்டர் மற்றும் காவலர்களைக் கைது செய்து, இன்ஸ்பெக்டர் வீட்டிலிருந்தே 50 கிலோ வெள்ளியைப் பறிமுதல் செய்து அதிரடி காட்டினார். மேலும், கடந்த 2017-ஆம் ஆண்டு கோரக்பூரில் பணியாற்றியபோது, அப்போதைய ஆளுங்கட்சி எம்.எல்.ஏ-வையே எதிர்த்து நின்று மக்கள் மத்தியில் நற்பெயர் பெற்றவர். தற்போது சுல்தான்பூரில் குற்றங்களைக் குறைக்க அவர் எடுத்து வரும் நடவடிக்கைகள் உபி காவல்துறையில் பெரிய பேசுபொருளாக மாறியுள்ளது.