உடல் ஆரோக்கியத்திற்காக ஜிம்மிற்குச் செல்பவர்கள், தகுந்த பாதுகாப்பு முறைகளைக் கையாளாவிட்டால் அது உயிருக்கே ஆபத்தாக முடியும் என்பதற்குச் சான்றாக ஒரு அதிர்ச்சிகரமான வீடியோ சமூக வலைதளங்களில் வைரலாகி வருகிறது. வைரலாகி வரும் அந்த வீடியோவில், வாலிபர் ஒருவர் சுமார் 165 கிலோ எடையுள்ள ‘பெஞ்ச் பிரஸ்’ (Bench Press) பயிற்சியைச் செய்ய முயற்சிக்கிறார். ஆரம்பத்தில் சாதாரணமாகத் தெரிந்த அந்த முயற்சி, சில நொடிகளில் விபரீதமாக மாறியது. அவர் எடையைத் தூக்க முடியாமல் திணறியபோது, அந்த கனமான இரும்பு பார்பெல் (Barbell) மெல்ல அவரது நெஞ்சுப் பகுதியிலிருந்து கழுத்தை நோக்கிச் சரிந்தது.

 

அவருக்கு உதவியாக அருகே நின்று கொண்டிருந்த பெண், நிலைமை மோசமாவதைக் கண்டு உடனடியாகச் செயல்பட்டார். 165 கிலோ எடை என்பது ஒரு பெண்ணால் தனியாகத் தூக்க முடியாத அளவு அதிகம் என்றாலும், அவர் தனது முழு வலிமையையும் பிரயோகித்து அந்தப் பார்பெல்லை சற்று மேலே உயர்த்தினார். அந்தச் சிறிய இடைவெளியைப் பயன்படுத்தி, கழுத்தில் பாரம் ஏறுவதற்குள் அந்த வாலிபர் சாமர்த்தியமாக உருண்டு வெளியே வந்து உயிர் தப்பினார்.

இந்த வீடியோவைப் பார்த்த நெட்டிசன்கள், இது ‘ஈகோ லிஃப்டிங்’ (Ego Lifting) – அதாவது தனது உடல் தகுதியை மீறி மற்றவர்களுக்குக் காட்ட வேண்டும் என்பதற்காக அதிக எடையைத் தூக்கும் முயற்சி என்று சாடி வருகின்றனர். இவ்வளவு கனமான எடைகளைத் தூக்கும்போது தகுந்த பயிற்சியாளர்கள் அல்லது ஒன்றுக்கும் மேற்பட்ட உதவியாளர்கள் அருகில் இருப்பது அவசியம். முறையான தொழில்நுட்பம் இன்றி எடையைத் தூக்குவது முதுகுத்தண்டு மற்றும் கழுத்துப் பகுதியில் நிரந்தரப் பாதிப்பை ஏற்படுத்தும்.

மேலும் சரியான நேரத்தில் துணிச்சலாகச் செயல்பட்டு ஒரு உயிரைக் காப்பாற்றிய அந்தப் பெண்ணிற்கு இணையத்தில் பாராட்டுகள் குவிந்து வருகின்றன. அதே சமயம், ஜிம்மிற்குச் செல்பவர்களுக்கு இந்த வீடியோ ஒரு பாடமாக அமைந்துள்ளது.