தமிழக வெற்றிக் கழகத்தின் தலைவர் விஜய், திருச்சி கிழக்குத் தொகுதியில் தனது தேர்தல் பிரசாரத்தை மேற்கொண்டபோது, அங்கிருந்த தொண்டர் ஒருவர் கொடுத்த வெள்ளை நிறப் புறாவைப் பறக்கவிட்டார். அந்தப் புறாவின் இறக்கைகளில் தவெக கட்சியின் கொடியின் வர்ணங்கள் பூசப்பட்டிருந்தது பெரும் விவாதத்தை ஏற்படுத்தியது.
இந்நிலையில், விலங்குகள் நல அமைப்பான பீட்டா இந்தியா, இது தொடர்பாக விஜய்க்கு ஒரு கடிதத்தை எழுதியுள்ளது. அந்தக் கடிதத்தில், “தேர்தல் பிரசார நடவடிக்கைகளில் விலங்குகளையோ அல்லது பறவைகளையோ பயன்படுத்துவது அவற்றுக்குத் தேவையற்ற துன்பத்தைத் தரும்.
எனவே, இனிவரும் காலங்களில் பிரசாரங்களில் விலங்குகளைப் பயன்படுத்துவதைத் தடை செய்ய உங்கள் கட்சி கொள்கை அளவில் முடிவெடுக்க வேண்டும்” என பீட்டா கேட்டுக்கொண்டுள்ளது.
ஏற்கனவே கட்சிப் பெயர் மற்றும் கொடி அறிமுகத்தின் போது பல்வேறு விமர்சனங்களைச் சந்தித்த தவெக-விற்கு, இப்போது பீட்டா அமைப்பின் இந்தக் கடிதம் புதிய தலைவலியை ஏற்படுத்தியுள்ளது. இது குறித்து அக்கட்சியின் தரப்பிலிருந்து என்ன பதில் வரப்போகிறது என்பதைப் பொறுத்திருந்துதான் பார்க்க வேண்டும்.
