தெலுங்கானாவின் ஐதராபாத் நகரைச் சேர்ந்த 27 வயது சந்திரசேகர் போலே, பல் மருத்துவத்தில் அறுவை சிகிச்சை பட்டப்படிப்பை முடித்து 2023-ஆம் ஆண்டு உயர் கல்விக்காக அமெரிக்கா சென்றார். அங்கு முதுநிலை படிப்பை முடித்த சந்திரசேகர், நிரந்தர வேலை தேடி வரும் வரை டெக்சாஸ் மாகாணத்தின் டல்லாஸ் நகரில் உள்ள எரிவாயு நிலையத்தில் பகுதி நேர பணியாளராகப் பணியாற்றி வந்தார்.

இந்நிலையில், நேற்றிரவு பணியில் இருந்தபோது மர்ம நபர் ஒருவர் துப்பாக்கியால் அவரைச் சுட்டு தப்பினார். படுகாயமடைந்த சந்திரசேகர், சிகிச்சை பலனின்றி உயிரிழந்தார். இந்தச் சம்பவம் அமெரிக்காவில் இந்திய மாணவர்களின் பாதுகாப்பு குறித்த கவலையை மீண்டும் எழுப்பியுள்ளது.

சம்பவம் தெரியத் தெரிந்ததும், தெலுங்கானாவில் உள்ள சந்திரசேகரின் பெற்றோருக்கு தகவல் தெரிவிக்கப்பட்டது, அவர்கள் கடும் அதிர்ச்சியடைந்தனர். தெலுங்கானா முதலமைச்சர் ரேவந்த் ரெட்டி, பெற்றோருக்கு ஆறுதல் தெரிவித்து, உடலை இந்தியாவுக்கு கொண்டு வருவதற்கு அரசு சார்பில் அனைத்து உதவிகளும் செய்யப்படும் என உறுதியளித்தார்.

மேலும், ஹூஸ்டன் இந்திய தூதரகமும் இந்திய மாணவரின் மரணத்திற்கு இரங்கல் தெரிவித்து, உடல் அனுப்புதல் தொடர்பான அனைத்து ஏற்பாடுகளிலும் முழு ஒத்துழைப்பு அளிக்கப்படும் என அறிவித்துள்ளது. இந்த விவகாரத்தில் போலீஸார் விரைவாக விசாரணை நடத்தி குற்றவாளியை  பிடிக்க முயற்சி செய்து வருகின்றனர்.