சென்னையில் நடைபெற்ற தமிழ்நாடு மாநில கல்விக் கொள்கை வெளியீட்டு விழாவில் முதலமைச்சர் மு.க.ஸ்டாலின் உரையாற்றினார்.

இந்நிகழ்வில் பேசும்போது, “தமிழ்நாடு அரசு எப்போதும் பின்பற்றிக் கொண்டிருக்கும் இருமொழிக் கொள்கைதான் நம்முடைய உறுதியான கொள்கை. தாய்மொழி தமிழுக்கு முக்கியத்துவம் அளிப்பதோடு, உலகின் வாயிலாக திறக்கும் ஆங்கிலத்தையும் கற்றுத்தருவதே எங்கள் நோக்கம்.

இது காலத்தால் சோதிக்கப்பட்ட கொள்கை, அதை எந்த அழுத்தத்திற்கும் இடம் தராமல் தொடர்ந்தும் காக்கப்போவோம். மாநிலத்தின் தனித்துவத்தையும், மாணவர்களின் வளர்ச்சியையும் கருத்தில் கொண்டு இந்தக் கல்விக் கொள்கை உருவாக்கப்பட்டுள்ளது” என்றார். மேலும், தமிழக கல்வி முறை எப்போதும் மாணவர்களின் சிந்தனைத் திறன், சமத்துவம், சமூக நீதி ஆகியவற்றை முன்னிறுத்தும் வகையில் இருக்கும் என்றும் அவர் வலியுறுத்தினார்.