தமிழக அரசின் நிர்வாகக் குளறுபடிகள் மற்றும் ஊழல்களைத் தனது யூடியூப் சேனல் வாயிலாகத் தொடர்ச்சியாக விமர்சித்து வந்த அரசியல் விமர்சகர் சவுக்கு சங்கரின் தாயார் கமலா (74), இன்று (ஏப்ரல் 13) உடல்நலக் குறைவால் காலமானார்.

தனது மகன் சவுக்கு சங்கர் மீதான கைது நடவடிக்கைகளை எதிர்த்தும், அவரைச் சிறையிலிருந்து விடுவிக்கக் கோரியும் அவரது தாயார் கமலா தொடர்ச்சியாகச் சட்டப் போராட்டங்களை முன்னெடுத்து வந்தார். கடந்த சில நாட்களாக வயது முதிர்வு மற்றும் உடல்நலப் பாதிப்பால் சிகிச்சை பெற்று வந்த அவர், இன்று மதியம் சிகிச்சை பலனின்றி உயிரிழந்தார்.

கடந்த 2024-ஆம் ஆண்டு பெண் காவலர்களை அவதூறாகப் பேசியதாகத் தொடரப்பட்ட வழக்கில் சவுக்கு சங்கர் கைது செய்யப்பட்டார். அவர் மீது குண்டர் சட்டம் பாயப்பட்ட நிலையில், உச்ச நீதிமன்றம் அதனை ரத்து செய்து ஜாமீன் வழங்கியது. பின்னர், டிசம்பர் 2024-ல் கஞ்சா வழக்கு உள்ளிட்ட பல்வேறு புகார்களில் மீண்டும் அவர் கைது செய்யப்பட்டார்.

மருத்துவ காரணங்களுக்காக அவருக்கு நிபந்தனை ஜாமீன் வழங்கப்பட்டிருந்த நிலையில், ஜாமீன் நிபந்தனைகளை மீறியதாகக் கூறி கடந்த ஏப்ரல் 8-ஆம் தேதி ஆந்திராவில் வைத்து சென்னை போலீஸார் அவரை மீண்டும் கைது செய்தனர். தற்போது அவர் மீது மீண்டும் குண்டர் சட்டம் பாயப்பட்டு, சென்னை புழல் சிறையில் அடைக்கப்பட்டுள்ளார்.

தாயாரின் மறைவுச் செய்தியைத் தொடர்ந்து, அவரது இறுதிச் சடங்குகளில் பங்கேற்கவும், மகனாகச் செய்ய வேண்டிய இறுதிக்கடமைகளை ஆற்றவும் சவுக்கு சங்கருக்கு நீதிமன்றம் பரோல் வழங்கி உத்தரவிட்டுள்ளது. பலத்த போலீஸ் பாதுகாப்புடன் அவர் சிறையிலிருந்து அழைத்து வரப்பட உள்ளார். சவுக்கு சங்கரின் தாயார் மறைவுக்கு அரசியல் பிரமுகர்கள் மற்றும் சமூக ஆர்வலர்கள் பலரும் தங்களது இரங்கல்களைத் தெரிவித்து வருகின்றனர்.