தெற்கு டெல்லி பகுதியில் உள்ள உணவகம் ஒன்றில் ஏற்பட்ட  தீ விபத்தில் சிக்கி 10 பேர் பரிதாபமாக உயிரிழந்தனர். மேலும் 11 பேர் படுகாயமடைந்து மருத்துவமனையில் அனுமதிக்கப்பட்டுள்ளனர். தெற்கு டெல்லியில் உள்ள மால்வியா நகர் பகுதியில் புகழ்பெற்ற உணவகம் ஒன்று செயல்பட்டு வருகிறது. வழக்கம் போல் இன்று வாடிக்கையாளர்கள் மற்றும் ஊழியர்களுடன் உணவகம் பரபரப்பாக இயங்கிக் கொண்டிருந்தது. அப்போது, எதிர்பாராத விதமாகக் கட்டிடத்தின் அடித்தளத்தில்  திடீரென தீப் பிடித்தது.

அடித்தளத்தில் பிடிக்கத் தொடங்கிய தீ, அடுத்த சில நிமிடங்களிலேயே மளமளவெனக் கட்டிடத்தின் மேல் தளங்களுக்கும் வேகமாகப் பரவியது. இதனால் கட்டிடத்திற்குள் இருந்தவர்கள் வெளியேற முடியாமல் கரும்புகைக்கு நடுவே சிக்கிக் கொண்டனர். இதுகுறித்துத் தகவல் அறிந்ததும் டெல்லி தீயணைப்புத் துறையினர் மற்றும்  காவல் துறையினர் சம்பவ இடத்திற்கு விரைந்து வந்தனர்.

தீயணைப்பு வீரர்கள் நீண்ட நேரம் போராடி தீயைக் கட்டுக்குள் கொண்டு வந்தனர். எனினும், இந்த விபத்தில் தீக்காயங்கள் மற்றும் மூச்சுத்திணறல் காரணமாக 10 பேர் பரிதாபமாக உயிரிழந்தனர். மேலும், கட்டிடத்தில் இருந்து மீட்கப்பட்ட 11 பேர் பலத்த காயங்களுடன் சிகிச்சைக்காக அருகில் உள்ள மருத்துவமனையில் அனுமதிக்கப்பட்டுள்ளனர். அவர்களுக்குத் தீவிர சிகிச்சை அளிக்கப்பட்டு வருகிறது.

விபத்து நடந்த இடத்தில் டெல்லி போலீசாரும் தீயணைப்புத் துறையினரும் இணைந்து தொடர்ந்து மீட்புப் பணிகளை மேற்கொண்டு வருகின்றனர். விபத்துக்கான துல்லியமான காரணம் குறித்துப் போலீசார் வழக்குப் பதிவு செய்து விசாரணை நடத்தி வருகின்றனர். இச்சம்பவம் அப்பகுதியில் பெரும் சோகத்தை ஏற்படுத்தியுள்ளது.