மதுரை மாவட்டம் உசிலம்பட்டி பகுதியில் இயங்கி வரும் அரசு மாதிரி மேல்நிலைப் பள்ளியில் படித்து வந்த நிஷாந்தி என்ற மாணவி திடீரெனத் தூக்கிட்டுத் தற்கொலை செய்து கொண்ட சம்பவம் அப்பகுதியில் பெரும் சோகத்தையும் கொந்தளிப்பையும் ஏற்படுத்தியுள்ளது. இந்த விபரீத முடிவுக்குப் பள்ளியின் தலைமை ஆசிரியை விமலா தேவியின் முறையற்ற செயல்பாடுகளும், பெற்றோரிடம் அவர் கடினமாக நடந்துகொண்ட விதம் தான் முக்கியக் காரணம் என்ற குற்றச்சாட்டுகள் எழுந்தன.

இந்தச் சம்பவம் குறித்துத் தீவிர விசாரணை நடத்த மாவட்ட முதன்மை கல்வி அலுவலருக்குப் பள்ளிக் கல்வித்துறை உத்தரவிட்டிருந்தது. அதன்பேரில் நடத்தப்பட்ட விசாரணையில், மாணவியின் சேர்க்கையின் போது தலைமை ஆசிரியை பொறுப்பற்ற முறையிலும் கடுமையாகவும் நடந்துகொண்டது உறுதி செய்யப்பட்டது. முறையான வழிமுறைகளைப் பின்பற்றாமல் தலைமை ஆசிரியை நடந்துகொண்ட விதம் கவனக்குறைவானது எனத் தெரியவந்ததை அடுத்து, அவரைச் சஸ்பெண்ட் செய்து மாவட்ட முதன்மை கல்வி அதிகாரி தயாளன் அதிரடி உத்தரவு பிறப்பித்தார்.

இதற்கிடையில், பள்ளிகளுக்கு வரும் பெற்றோர்களிடம் தலைமை ஆசிரியர்கள் மற்றும் ஆசிரியர்கள் எத்தகைய நாகரிகத்துடன் நடந்து கொள்ள வேண்டும் என்பது குறித்துப் பல்வேறு ஆலோசனைகளும் அறிவுறுத்தல்களும் வழங்கப்பட்டுள்ளன.  மாணவர்களின் மனநிலையைப் புரிந்துகொண்டு கல்வி நிறுவனங்கள் செயல்பட வேண்டும் என்ற கோரிக்கையும் வலுத்து வரும் நிலையில், இந்தச் சம்பவம் கல்வி வட்டாரத்தில் பெரும் விவாதத்தை ஏற்படுத்தியுள்ளது.