அமெரிக்காவின் டெக்சாஸ் மாநிலத்தில் ஆஸ்டின் மெட்கால்ஃப் கொலை வழக்கில் 35 ஆண்டுகள் சிறைத் தண்டனை பெற்றுள்ள கார்மெலோ அந்தோணியின் மறுவிசாரணை கோரிக்கை தொடர்பான விசாரணை தொடங்கியுள்ளது. நீதிபதி ஜான் ரோச் வழக்கில் இருந்து விலகிய நிலையில், ஓய்வுபெற்ற மாவட்ட நீதிபதி மைக்கேல் சிட்டி தலைமையில் இந்த விசாரணை நடைபெற்று வருகிறது. விசாரணையின் தொடக்கத்திலேயே வழக்கில் இதுவரை வெளியாகாததாகக் கூறப்படும் சில தகவல்கள் நீதிமன்றத்தில் முன்வைக்கப்பட்டன.

வழக்கறிஞர்கள் தரப்பில் முன்வைக்கப்பட்ட தகவலின்படி, கார்மெலோ அந்தோணி சில குறுஞ்செய்திகளில் ஒருவரை கத்தியால் குத்துவது குறித்து கற்பனை செய்து பேசியதாக அரசு தரப்பு குற்றம்சாட்டியுள்ளது. மேலும், சம்பவம் நடந்த நாளின் காலை அவர் ஒருவரை கொல்லும் நிலைக்கு நெருக்கமாக இருப்பதாக குறுஞ்செய்தி அனுப்பியதாகவும் வழக்கறிஞர் தரப்பில் தெரிவிக்கப்பட்டது. இதனை அடிப்படையாகக் கொண்டு அவரது மனநிலை மற்றும் முந்தைய நடத்தை குறித்து அரசு தரப்பு வாதங்களை முன்வைத்துள்ளது.

இதற்கிடையே, கொலை சம்பவத்திற்கு சில மணி நேரங்களுக்கு முன்பு கார்மெலோவின் காதலி அவரை பின்தொடர்வதாக பள்ளி நிர்வாகத்திடம் புகார் அளித்ததாகவும் தகவல்கள் வெளியாகியுள்ளன. ஏப்ரல் 2, 2025 அன்று பள்ளிக்கு சென்ற அவர், கார்மெலோவுடன் பிரிந்துவிட்டதாகவும், அவர் தன்னை பின்தொடர்வதாகவும் தெரிவித்ததாகக் கூறப்படுகிறது. அதே நாளில் நடைபெற்ற தடகளப் போட்டியின்போது ஆஸ்டின் மெட்கால்ஃப் கத்தியால் தாக்கப்பட்ட சம்பவம் தொடர்பாக இந்த தகவல் தற்போது நீதிமன்றத்தில் கவனம் பெற்றுள்ளது.

முன்னதாக, இந்த வழக்கில் நீதிபதி ஜான் ரோச் அளித்த பேட்டி சர்ச்சையை ஏற்படுத்தியது. விசாரணையில் வழங்கப்பட்ட தீர்ப்பு சரியானது என அவர் கூறியதாக தகவல்கள் வெளியானதைத் தொடர்ந்து, அவர் வழக்கில் இருந்து விலகினார். இதையடுத்து மறுவிசாரணை கோரிக்கையை ஓய்வுபெற்ற நீதிபதி மைக்கேல் சிட்டி விசாரித்து வருகிறார். கார்மெலோ அந்தோணி தற்போது டெக்சாஸில் உள்ள  சிறையில் அடைக்கப்பட்டுள்ளார். புதிய தகவல்கள் வெளியாகியுள்ள நிலையில், மறுவிசாரணை கோரிக்கையில் நீதிமன்றம் எவ்வாறு முடிவெடுக்கப் போகிறது என்பது அடுத்தகட்டத்தில் தெரியவரும்.