தமிழ்நாடு முதல்வர் விஜய்யின் அலுவலகத்தை மாற்றும் பணிகள் தற்போது அவசர அவசரமாகத் தொடங்கப்பட்டு நடைபெற்று வரும் நிலையில், இந்த திடீர் நடவடிக்கையின் பின்னணியில் இருக்கும் சுவாரஸ்யமான காரணம் தற்போது வெளியாகியுள்ளது. முதலமைச்சரின் புதிய அலுவலகப்பணிகள் மிக வேகமாக நடைபெற்று வருவது அரசியல் வட்டாரத்தில் பெரும் விவாதத்தைக் கிளப்பியுள்ளது.
அரசு தரப்பில் முறைப்படி டெண்டர் கோரப்பட்டு நடைமுறைகள் முடிவதற்கு முன்பாகவே, அவசர அவசரமாகப் பணிகளைத் தொடங்கி முறைகேட்டில் ஈடுபட்டுள்ளதாக எதிர்க்கட்சியினர் கடுமையாகக் குற்றஞ்சாட்டி வருகின்றனர். உரிய அனுமதி மற்றும் டெண்டர் விதிகளுக்கு மாறாக இந்தப் பணிகள் துரிதப்படுத்தப்பட்டு வருவதாக அவர்கள் அடுக்கடுக்கான புகார்களை முன்வைத்து வருகின்றனர்.
ஆனால், இந்த அவசரக் காரியத்திற்குப் பின்னால் ஒரு முக்கியமான ஆன்மீகக் காரணம் இருப்பதாகத் தகவல்கள் தெரிவிக்கின்றன. தமிழ் பாரம்பரிய வழக்கப்படி, ‘ஆடி மாதத்தில்’ புதிதாக எந்த ஒரு சுப காரியத்தையோ அல்லது புதிய பணிகளையோ தொடங்கக்கூடாது என்ற நம்பிக்கை உள்ளது. இதனால் ஆடி மாதம் பிறப்பதற்கு முன்பாகவே பணிகளைத் தொடங்கிவிட வேண்டும் என்பதில் முதலமைச்சர் தரப்பு தீவிரமாக இருந்ததாகக் கூறப்படுகிறது.
அதேவேளையில், எதிர்க்கட்சிகள் சுமத்தும் இந்தக் குற்றச்சாட்டுகளைத் தமிழக வெற்றிக் கழகத்தினர் (தவெக) முற்றிலும் மறுத்துள்ளனர். “அலுவலக மாற்றப் பணிகளில் எந்தவிதமான முறைகேடும் நடைபெறவில்லை; அனைத்து விதிகளும் சரியாகவே பின்பற்றப்படுகின்றன” எனத் தவெக தரப்பில் இருந்து அதிரடியாக விளக்கமளிக்கப்பட்டுள்ளது.
